Ministri i Financave, Hekuran Murati, ka deklaruar se ka raportime që disa punonjës të Byrosë Kosovare të Sigurimit po i detyrojnë bashkatdhetarët që të paguajnë policë kufitare që tashmë është e paguar nga Qeveria.
Duke bërë thirrje që të mos paguajnë për sigurimin kufitar, Murati përmes një postimi në Facebook i ka quajtur këta punonjës “të papërgjegjshëm”, që sipas tij, nuk i informojnë saktë bashkatdhetarët që polica kufitare është e subvencionuar për vetura deri në 9 pasagjerë.
“Ftoj të gjithë ata bashkatdhetarë që janë ballafaquar me raste të tilla, ku u është kërkuar të paguajnë për policën kufitare e që do duhej ta merrnin falas, që rastet t’i raportojnë tek policia në numrin 192”, ka shkruar ai.
Murati tutje ka thënë se disa raste tashmë janë raportuar se ka pasur edhe procedim penal për punonjësit e BKS-së.
Ai gjithashtu ka ftuar edhe Policinë dhe Prokurorinë që t’i trajtojnë me prioritet këto raste “të keqpërdorimeve”.
