Ministrja e Ekonomisë, Artane Rizvanolli ka thënë se propaganda, lajmet e rrejshme, lufta hibride me anë të përmbajtjes së krijuar me inteligjencë artificiale flasin ndryshe e shumë, por siç tha ajo “faktet në secilën fushë flasin saktë e qartë”
Rizvanolli përmes një postimi në rrjetin social në Facebook ka shkruar se me ardhjen e Qeverisë Kurti është ulë krimi i organizuar në veri të Kosovës.
“Ishte një kohë kur në veri lulëzonin laboratorët e drogës, mihja e kriptovalutave, e biznese tjera ilegale të kriminelëve të të gjitha etnive së bashku. Konsumi i energjisë rritej në mënyrë jonormale, 8-13 për qind për çdo vit, e këtë e paguanim ne qytetarët tjerë.
Rezultatet e luftës nga Qeveria e Republikës së Kosovës, Ministria e Punëve të Brendshme, Policia e Kosovës kundër krimit të organizuar filluan të shihen më 2022-3, me rënie 2.5 për qind dhe 8 për qind të konsumit të energjisë. E që nga 1 janari 2024 kur e zgjidhëm çështjen e mospagesës të qytetarëve të katër komunave veriore të Kosovës, konsumi ra për 35 për qind”, ka shkruar Rizvanolli.
Tutje ministrja Rizvanolli ka thënë se: “Rikujtojmë që kjo barrë për 24 vite u kushtoi qytetarëve të Republikës së Kosovës 348 milionë euro”.
