Deputetja e PDK-së, Blerta Deliu-Kodra, ka reaguar para protestës së sotme në Prishtinë kundër ngritjes së çmimit të energjisë elektrike.
Deliu – Kodra, përmes një postimi në Facebook, ka thënë se rritja e çmimit të rrymës është vjedhje e hapur ndaj qytetarëve.
“Është mundi i përditshëm që po ju vidhet pa mëshirë. Çfarë tjetër duhet të ju marrin? Dinjitetin? Të ardhmen?”, ka shkruar ajo, transmeton Telegrafi.
“Kjo padrejtësi duhet ndalur! Asnjë cent më shumë nga djersa e qytetarit!”, ka shkruar deputetja Deliu – Kodra.
Bordi i Zyrës së Rregullatorit të Energjisë e Kosovës (ZRRE) pritet të marrë vendim sot mbi propozimin për rritjen e çmimit të rrymës për 15 për qind.
Pak orë pas mbledhjes së rregullatorit në mëngjes është paralajmëruar një protestë në mesditë për ta kundërshtuar shtrenjtimin e rrymës.
Aktivisti i Iniciativës “Asnjë Cent Më Shumë”, Besnik Shabiu ka ftuar qytetarët për mobilizim për të kundërshtuar rritjen e çmimit të energjisë elektrike.
Rregullatori i energjisë propozoi muajin e kaluar shtrenjtimin e çmimit të energjisë elektrike në vend për rreth 15 për qind, duke argumentuar se rritja e tarifave këtë vit është e domosdoshme, për shkak të uljes së prodhimit të energjisë, rritjes së konsumit dhe varësisë së madhe nga importet me çmime të larta.
Kërkesa për shtrenjtimin e rrymës u kundërshtua nga Presidenca dhe nga qytetarë që protestuan të javën e kaluar.
Qeveria në detyrë i ka bërë thirrje ZRRE-së ta mos e shtrenjtojë çmimin e rrymës për konsumatorët që shpenzojmë më pak se 800 kilovat në muaj.
