Drejtoresha Menaxhuese e FMN-së, Kristalina Georgieva, ka lëshuar një deklaratë për media në lidhje me njoftimin për tarifat e SHBA-së.
“Ne jemi ende duke vlerësuar pasojat makroekonomike të masave të shpallura për tarifat, por ato qartësisht përfaqësojnë një rrezik të rëndësishëm për perspektivën globale në një kohë të rritjes së ngadaltë. Është e rëndësishme të shmangen hapat që mund të dëmtojnë më tej ekonominë botërore. Ne i bëjmë thirrje Shteteve të Bashkuara dhe partnerëve të tyre tregtarë që të punojnë në mënyrë konstruktive për të zgjidhur tensionet tregtare dhe për të reduktuar pasigurinë”, thuhet në deklaratën e Drejtoreshës Menaxhuese të FMN-së, Kristalina Georgieva.
Ajo ka thënë se do të ndajnë rezultatet e vlerësimit në Perspektivën Ekonomike Botërore, e cila do të publikohet në kohën e Takimeve Pranverore të FMN-së dhe Bankës Botërore më vonë këtë muaj.
