Rreth 5 javë pasi hapi tenderin, Autoriteti Rrugor Shqiptar (ARRSH) ka shpallur kompaninë fituese që do të kryejë ndërhyrjet emergjente për rikonstruksionin e Urës së Milotit mbi lumin Mat.
Punimet, që pritet të zgjasin 2 muaj, do të kryhen nga bashkimi i kompanive “Junik Shpk & Joos & Krasniqi – Baze”, që kanë ofruar 860 mijë euro. Kjo shumë është sa 80,5% e fondit limit prej 107.6 mln lekë të vënë në dispozicion nga ARRSH.
Sipas raportit teknik të përgatitur në bashkëpunim me Universitetin Politeknik të Tiranës, pilotat mbajtëse të urës janë ekspozuar dhe gërryer 3 – 5 metra, për shkak të erozionit dhe shfrytëzimit të pakontrolluar të shtratit të lumit.
Kontrata parashikon betonimin dhe mbrojtjen e pilotave, vendosjen e blloqeve të lidhura (gabioneve) për stabilizimin e shtratit, si dhe pastrimin dhe nivelimin e zonës përreth themeleve. Sipas parashikimeve, këto masa do të zgjasin jetëgjatësinë e urës për të paktën 5 deri në 10 vjet.
Sipas Autoritetit Rrugor Shqiptar, punimet do të nisin menjëherë, duke pasur parasysh se ndërhyrja klasifikohet si emergjente.
Ura e Milotit ndodhet në aksin rrugor Milot – Lezhë dhe është një nyje kyç në këtë aks kombëtar.
