Për herë të tretë nuk ka kaluar në Kuvend projektligji për energji elektrike, pasi nuk ka marrë mbështetjen e nevojshme për procedim me shmangie të procedurës, duke u kundërshtuar nga partitë opozitare.
Deputeti i PDK-së, Ferat Shala, theksoi se kjo parti nuk do ta mbështesë projektligjin në këtë formë, duke rikujtuar qëndrimin e njëjtë edhe në të kaluarën. Ai pretendoi se me këtë ligj do të hapej rruga për monopol, tendera të negociuar dhe humbje të milionave.
“Nuk do të miratojmë shmangie për këtë projektligj. Ky ka qenë qëndrim i yni edhe në seancën tjetër që është paraqitur ky projektligj…Konsultimet publike për këtë ligj janë bërë para një viti”- deklaroi ai.
Edhe deputetja e LDK-së, Janina Ymeri, kundërshtoi procedimin, duke theksuar ndikimin që mund të ketë ligji.
“Ndikojnë në sigurinë energjetike por edhe ndërkombëtare. Ne nuk e procedojmë shmangien për këtë ligj”-tha ajo.
Shefi i Grupit Parlamentar të AAK-së, Besnik Tahiri, tha se do të votojnë kundër për shkak se çdo projektligj po e sjellin jashtë procedurave.
“Grupi parlamentar i LVV-së nuk mund të sjellë shmangie sepse ne do të detyrohemi të kemi tash qëndrim politik. Sado që kemi pakënaqësi në përmbajtje… Qëndrimi ynë është edhe politik kur e dimë që edhe për pak orë do të përfundojë afati kohor për president…Është vetëm humbje kohe”- u shpreh Tahiri.
Nga ana tjetër, ministrja e Ekonomisë, Artane Rizvanolli, kritikoi opozitën për qëndrimin e saj, duke paralajmëruar pasoja financiare.
“E falënderoj deputetin Besnik Tahiri që e tha të vërtetën se pse nuk po e votojnë. Por dijeni që do ia humbni shtetit 9 milionë euro”- deklaroi ajo.
