Profesori i ekonomisë dhe ish-deputeti i Kuvendit të Kosovës, Muhamet Mustafa, është përfshirë në diskutimin mbi zhvillimin e kapaciteteve të reja prodhuese të energjisë elektrike në vend.
Sipas tij, çështja e centralit termik me gaz dhe gazifikimi (kimizimi) i linjitit nuk janë projekte konkurruese ose përjashtuese.
“Kjo çështje e diskutuar edhe më herët, me të drejtë u bë njëra nga çështje debatuese edhe në fushatën në zhvillim e sipër për zgjedhjet e të dielës. Megjithatë, edhe lidhur me këtë po tentohet që debati t’i përshtatet luftës së egër politike, logjikës së istikameve. Njëra apo tjetra mundësi nuk janë alternativa në këtë moment”, thotë Mustafa.
Ai potencoi se centrali me gaz (të lëngët apo tjetër) duhet të realizohet shpejt e menjëherë. Mustafa thotë se kjo është çështje e një mandati për shkak të krizës së tejzgjatur edhe për mungesë të kapaciteteve të reja më se të nevojshme gjeneruese.
Nga ana tjetër, profesori i ekonomisë thotë se centrali gjenerues mbi bazë të mundësive potenciale për gazifikimin (kimizimin) e linjitit është një teknologji në zhvillim e sipër, ende në fazën e pilotimit dhe testimeve për të plotësuar kriteret që lidhen me tranzicionin e gjelbër e problemet klimatike, sidomos të BE-së.
“Me së shumti ka avancuar në ShBA dhe kjo padyshim është një çështje perspektive në te cilën edhe Kosova duhet të kyçet për të përcjellë zhvillimet dhe përgatitur studimet e fizibilitetit që do të mund të hynin në punë në një horizont më të gjatë kohor”, u shpreh profesori i ekonomisë dhe ish-deputeti i Kuvendit të Kosovës, Muhamet Mustafa.
