Këshilli për Mbrojtjen e të Drejtave dhe Lirive të Njeriut ka reaguar pas vendimit të Qeverisë që të gjitha pensionet të rriten për 20 për qind. KMDLNj thotë se kjo është “rritje klienteliste” dhe se do të “përkthehet në përqindje të votave për zgjedhjet e ardhshme”.
“Ka qenë e sigurt se qeveria do t’i rrisë pensionet dhe skemat sociale sikur që ka mundësi reale të rriten edhe pagat në arsim. Realisht këto grupe të targetuara përfituese kanë shumë votues andaj edhe ishte i pritshëm vendimi i qeverisë. KMDLNj-ë edhe më parë ka kërkuar të rriten pensionet por jo në këtë mënyrë dhe këtë përqindje. KMDLNj – ë kishte kërkuar të bëhej indeksimi në vitin 2022 kur inflacioni ishte 22 përqind dhe pastaj të bëhet rritja. Me rritjen prej 20 përqind, askush nuk përfiton përveç qeverisë. Madje, me këtë rritje pensionistët dhe përfituesit tjerë nuk marrin më shumë se 90 përqind nga pensionet paraprake. Qeveria është dashur të konsultohet me përfaqësuesit e pensionistëve për të arritur një zgjidhje të pranuar përtë gjithë. Për më keq, qeveria ka injoruar Shoqatën e Pensionistëve të Kosovës duke mos i pranuar në takime dhe duke shpërfillur, nga pozita e arrogancës së pushtetit, dialogun social. Në këtë mënyrë vetëm e ka betonuar agoninë e pensionistëve në luftë për mbijetesë nën çdo dinjitet përmes rritjes klienteliste të pensioneve që do të përkthej në përqindje të votave për zgjedhjet e ardhshme. Në anën tjetër me mospërfshirje të kategorive të luftës në këtë “rritje” është diskriminim flagrant dhe shkelje e barazisë para ligjit.”
KMDLNJ thotë se pensionistët dhe përfituesit e tjerë nuk duhet të pajtohen me këtë rritje.
“Pensionistët dhe përfituesit tjerë nuk duhet të pajtohen me këtë rritje klienteliste të pensionit dhe duhet të kundërshtojnë, qoftë përmes rrugëve ligjore apo edhe me votën e tyre. Ka qenë detyrim ligjor i qeverisë që të bëjë indeksimin e pensioneve në përputhje me rritjen e shkallës së inflacionit e jo të konsiderohet se është vullnet i mirë i qeverisë dhe përkujdesje për pensionistët.”
“Le të merren praktikat e vendeve të rajonit dhe të krahasohen me vendimin e qeverisë për pensione. Qeveria e Kosovës me këtë klientelizëm diskriminues në mënyrë brutale po i shkelë të drejtat e njeriut të pensionistëve dhe grupeve të cenueshme për një jetë më të dinjitetshme dhe qëndrueshmëri sociale.”
