Agjencia e Statistikave të Kosovës ka publikuar Anketën e Fuqisë Punëtore për tremujorin e tretë të vitit 2018. Në këtë raport, ASK jep të dhëna tronditëse mbi një kateogri të të rinjve në Kosovë që jetojnë në kushte të mjerueshme, përcjell Buletini Ekonomik.
Bëhet fjalë për 101 mijë e 300 të rinj që sipas ASK-së janë krejtësisht të shkëputur nga tregu i punës. Kjo i bie që përveç që nuk janë të punësuar, ata nuk ndjekin shkollën e as ndonjë trajnim.
“Përqindjet e larta të këtij grupi në popullsinë e të rinjve rrisin shqetësimet në lidhje me punësimin e të rinjve në të ardhmen pasi tregon shkëputje nga tregu i punës. Përveç kësaj, një numër i madh i të rinjve të pa angazhuar në vendet me papunësi të lartë të të rinjve, siç është Kosova, mund të shkaktojë uljen e fitimeve për shkak të rritjes së konkurrencës, si dhe ka mundësi t’i kontribuojë problemeve sociale”, thuhet nëraportin e ASK-së.
Në tremujorin e tretë të vitit 2018, 101 mijë 260 të rinj (të moshës 15 deri 24) në Kosovë nuk ndiqnin shkollimin, nuk ishin të punësuar apo në trajnim dhe përbënin 30.2 % të popullsisë së re. /Buletini Ekonomik/
