Qeveria e Kosovës në mbledhjen e sotme të kabinetit qeveritar, ka miratuar draft koncept-dokumentin për themelimin e Fondit Sovran.
Kryeministri Albin Kurti gjatë prezantimit të draftit për miratim, tha se me themelimin e Fondit Sovran synohet edhe mbyllja e Agjencisë Kosovare të Privatizimit (AKP). Fondi në fjalë pas themelimit, do t’i ketë nën menaxhim të gjitha asetet strategjike të Kosovës dhe do ta mbajë përgjegjësinë për investimet dhe rritjen e vlerës së tyre.
Sipas Kurtit, me anë të Fondit Sovran gjithashtu synohet që të bëhet një transformim ekonomik, të ketë riorientim të investimeve dhe rritje të punësimit.
Në bazë të paralajmërimeve të mëhershme të Qeverisë rreth themelimit të Fondit Sovran, ky i fundit pritet të jetë një mekanizëm i ri dhe efektiv për orientimin e investimeve, përmirësimin e qeverisjes korporative, ngritjen e konkurrueshmërisë dhe cilësisë, rritjen e shkathtësive dhe të punësimit, si dhe eliminimit të keqpërdorimit dhe korrupsionit në sektorin e ndërmarrjeve publike.
“Fondi Sovran do t’i japë një jetë të re shumë aseteve që qëndrojnë të mbyllura apo nënshfrytëzuara në fondin e AKP-së, përmes riorganizimit, rihabilitimit dhe rivitalizimit të tyre në forma të reja të funksionalizimit komercial dhe financiar”, thuhej në komunikatat qeveritare. /Buletini Ekonomik/
