Drejtor menaxhues i Fondit për Garanci Kreditore, Besnik Berisha, bën të ditur se deri në fund të tetorit 2018 shuma totale e kredive të miratuara nga bankat dhe që janë dorëzuar nën mbulimin e garancisë ka arritur në 75.3 milionë euro të shpërndara në mbi 1.928 kredi, ndërsa sipas tij pjesa e garantuar nga Fondi Kosovar për Garanci Kreditore ka arritur në 36 milionë euro.
Besnik Berisha, drejtor menaxhues i Fondit për Garanci Kreditore, bën të ditur se institucioni që e drejton është i pavarur, por u lëshon garanci institucioneve financiare për mbulimin e rrezikut për ndërmarrjet mikro, të vogla dhe të mesme. Sipas tij, deri në fund të tetorit 2018 shuma totale e kredive të miratuara nga bankat dhe që janë dorëzuar nën mbulimin e garancisë ka arritur në 75.3 milionë euro të shpërndara në mbi 1.928 kredi, ndërsa pjesa e garantuar nga Fondi Kosovar për Garanci Kreditore ka arritur në 36 milionë euro. “Shuma e përgjithshme e garancive të lëshuara gjer më tani është 36 milionë euro, ndërsa rritja vjetore e vitit 2018 e bazuar në principalin e portofolit të garancioneve është 124%”, ka thënë Berisha.
Ai ka bërë të ditur se garancitë kreditore lëshohen për NMVM-të në pronësi private, të cilat kanë regjistrimin e biznesit dhe numrat fiskalë, si dhe të cilat janë njëqind për qind (100%) në pronësi të qytetarëve privatë ose banorëve të përhershëm të Kosovës.
Fondi Kosovar për Garanci Kreditore (FKGK) përmes garantimit të portofolit kreditor të institucioneve financiare synon të përkrahë sektorin privat në Kosovë, duke zgjeruar qasjen në financa për NMVM-të të cilat nuk kanë kolateral të mjaftueshëm, duke mundësuar kështu edhe krijimin e vendeve të punës, rritjen e prodhimit vendor, përmirësimin e bilancit tregtar dhe avancimin e mundësive për sektorët ekonomikë më pak të shërbyer.
Për më tepër, si rrjedhojë e kësaj NMVM-të në sajë të përkrahjes financiare do të mundë të realizojnë investime të reja, investime inovative, duke rritur kështu konkurrueshmëri në tregun lokal, regjional, ndërkombëtar etj. Sipas Berishës, investimet e bëra me këto kredi premtojnë efekte pozitive në përgjithësi. “Sipas parashikimit të kredimarrësve, nga kreditë e lëshuara deri në fund të tetorit 2018 do të krijohen 2.681 vende të reja pune, si dhe 79.8 milionë euro rritje të qarkullimit mbi bazën e tanishme të qarkullimit të NMVM-ve përkatëse”, ka sqaruar ai.
