Kryeministri i Kosovës, Ramush Haradinaj, thotë se është i painfornuar rreth deklaratës së presidentit Hahsim Thaçi, i cili ka thënë se Kosova është e gatshme ta shqyrtojë heqjen masës 100 për qind ndaj mallrave serbe.
“Nuk e kam lexuar atë deklaratë të presidentit”, tha Haradinaj.
I pyetur po ashtu rreth deklaratës se presidentit Thaçi, i cili ka thënë se ideja për taksën ishte e Enver Hoxhajt dhe e Kadri Veselit, Haradinaj është përgjigjur shkurt se “ne e duam presidentin, është i joni”, raporton KTV.
Por, Haradinaj thotë se nuk do të zmbrapset nga vendimi për taksën 100 për qind ndaj produkteve serbe, pa e njohur Serbia Kosovën.
“Taksa është vendim i Qeverisë dhe është vendim legjitim, për të cilin janë informuar të gjitha Qeveritë e vendeve tjera. Nëse na njeh Serbia, sot e heqim”, ka thënë ai.
Haradinaj tha po ashtu se vendi e ka avancuar infrastrukturën ligjore në fushën e investimeve strategjike dhe po hyn në një fazë të zhvillimit intensiv.
“Së shpejti do të kemi investimin e parë strategjik nga njëmbëdhjetë të tilla që janë në proces me rreth dy miliardë euro. Gjatë vizitës së punës në Ministrinë e Tregtisë dhe Industrisë, me ministrin Endrit Shala biseduam për domosdoshmërinë e krijimit të një vlere të re si nxitje e zhvillimit të hovshëm ekonomik”, ka thënë Haradinaj.
Këto komente Haradinaj i ka bërë gjatë një konference për media pas vizitës në Ministrinë e Tregtisë dhe Industrisë. /Koha
