Kryeministri i Kosovës, Ramush Haradinaj javen e kaluar në opinionin publik prezantoi një investitor potencial të shquar, siç e quajti ai indianin Cheetan Sandesara, pronar i kompanisë ‘Sandesara Group’. Periskopi pas një hulumtimi rreth këtij biznesmeni që punën e kishte zhvilluar kryesisht në Nigeri, ka kuptuar se gjatë vitit të kaluar, bashkë me vëllain e tij ishin akuzuar për mashtrim dhe shpërlarje parash.
Sipas një postimi të Haradinajt në Facebook të datës 22 Shkurt 2019, Sandesara i cili kishte punë me drejtësinë është i interesuar të investojë në sektorin e turizmit dhe bujqësisë në Kosovë.
‘’Nga përfaqësuesi i “Sandesara Group” nga Nigeria, Cheetan Sandesara, u njoftova për interesimin për të investuar në sektorin e turizmit dhe të bujqësisë në bashkëpunim me degën e tyre në Amerikë. Kosova ka një spektër të gjerë ofertash për investimet e huaja direkte dhe si rezultat i reformës fiskale, lehtësirave tatimore dhe garantimit të kapitalit të tyre nga Qeveria, interesimi i investitorëve për vendin tonë është rritur hovshëm’’, thuhej në njoftimin e Kryeministrit.
Megjithatë Periskopi ka gjetur se në shtator të vitit të kaluar, Cheetan Sandesara bashkë me vëllain e tij Nitin Sandesara akuzoheshin për mashtrim të një konsorciumi bankash për më shumë se 5 mijë krore (valutë afrikane).
Byroja Qendrore e Investigimeve i kishte kërkuar informacione Interpolit të Nigerisë për familjen Sandesaran që besohej se po fshiheshin diku në vendin afrikan.
Në qershor, direktorati i forcave të ligjit u kishte konfiskuar një pasuri prej 4 mijë e 700 kroreve të Sterling Biotech Limited, ndërsa po investigonte në rastin e shpëlarjes së parave.
Përgjatë këtyre hetimeve, u lëshuan urdhër-arreste për shumë persona, përfshirë edhe Nitin Sandesaran.
Po ashtu, mësohet se për Sandensarat ishte lëshuar edhe urdhëri i ekstradimit nga Nigeria e më pas Italia për në Indi, e që iu kishin shmangur thirrjeve për nisjen e hetimeve.
Vëllezërit Sandesara kanë udhëhequr me një numër të madh kompanish, duke filluar në vitet ’80 me një të çajit. Fitimet më të mëdha i kishin nga eksplorimi i naftës dhe gazit në Nigeri.
Kryeministri Ramush Haradinanaj vazhdimisht fton investitoret e huaj që të hapin bizneset e tyre në vendin tonë, duke thënë se Kosova është adresë e duhur dhe krijon kushte të mira.
‘’Kosova është adresa e duhur për investitorët e huaj. Qeveria ka punuar në vazhdimësi që të krijoj kushtet më të mira për investimet direkte. Tani me ligjin e ri dhe me progresin e bërë në shumë fusha, është krijuar klimë e mirë për partneritet të suksesshëm dhe të qëndrueshëm ekonomik me investitorët serioz”, ka thënë së fundmi Haradinaj.
Gjatë vitit 2018, investimet e huaja kishin shënuar rënie të madhe. Vetëm në pesë mujorin e parë të vitit të kaluar, kishte pasur rënie prej hiç më pak se për 34 për qind. Njohësit e çështjeve ekonomike kishin thënë se rënia e investimeve ekonomike ka ndodhur për shkak të mos stabilitetit politik në vend dhe për shkak të ngecjeve në realizimin e projekteve të mëdha.
