Nga një aksident në autostradën “Ibrahim Rugova” kanë mbetur të vdekur dy të rinj, njëri 25 vjeçar e tjetri 20.
Familja Bytyqi ka hapur të pamën për djalin e tyre të vetëm, Arianitin, që vdiq aksidentalisht.
Babi i tij, Kadri Bytyqi, thotë se djali i tij ka një vit që punon në “Sharr Travel”.
Ai tregon se me rrogën që merrte mezi mbante veten.
“Pak e ka pasë punën e vështirë se nuk kishte ditë pushimi. Kur e thirrshin në 12 të natës iu dashke me shku shembull në Gjilan, Pejë a në Shqipëri. Gjumë bojke shumë pak, një person që i bën 10 orë punë duhet edhe me pushu”, ka thënë Bytyqi për T7.
Në anën tjetër, miku i Arianitit e përshkruan të ndjerin si njeri të urtë, i cili e ka bërë punën pa ankesa e me qejf.
“Në 7 të sabahut, në 12 të natës e kanë thirrë kjo kompania “Sharr Travel”, orar pa orar, nuk ka qenë njeri me sherr, çka i kanë thënë ka ba” u shpreh miku i tij.
Ditë zie kanë edhe familja Gallopeni nga fshati Doberdelan i Suharekës.
Djali i tyre ka punuar më shumë se dy vite në kompaninë “Sharr Travel”.
Prapa kamerave familja e të ndjerit kanë thënë se Gentriti nuk ka pasur asnjë problem me kompaninë. /Insajderi/
