Qeveria e Kosovës gjatë vitit 2018 ka subvencionuar 51 persona fizik, për raste të ndryshme, pa formuar fare komision për vlerësimin e kërkesave, siç e kërkon Vendimi qeveritar me nr.10/33 për miratimin e programeve për komunitete.
Në total shuma për këto subvencione arrin në 318 mijë euro.
“Për 51 raste të personave fizik me pagesë totale prej 318,500 euro, nuk është formuar komision për vlerësimin e këtyre kërkesave, edhe pse vendimet janë të nënshkruara nga Kryeministri. Procedimi i shpejtë pa procedura i këtyre pagesave, është bërë për shkak të ndjeshmërisë së kërkesave të tyre”, thuhet në raportin e Auditorit për Zyrën e Kryeministrit, për vitin 2018.
Sipas Auditorit, kjo ka bërë që shumë prej subvencioneve të dhëna për raste të ndjeshme, edhe të keqpërdoren. Madje, në disa raste, Auditori ka gjetur se subvencionet e Qeverisë, përfituesit i kanë përdorur për meremetime luksi, shkruan Buletini Ekonomik.
“Sa i përket mbështetjes financiare ku është aplikuar vlerësimi nga komisioni, vlen të ceket se duke mos përfshirë rastet e domosdoshme për ndihmesë, tek subvencionet për persona fizik kemi hasur në dhënien e ndihmave që janë përdorë për meremetime luksi, siç janë: blerja e roletave dhe zbukurimi me fasadë”, ka vlerësuar Auditori.
Sipas tij, konkluzioni është se jo të gjitha kërkesat janë vlerësuar me objektivizëm.
“Mangësitë e paraqitura në procesin e dhënies dhe monitorimit të subvencioneve, rrisin rrezikun për shpenzime jo racionale të parasë publike si dhe mos arritjen e objektivave me subvencione”. /Buletini Ekonomik/
