Ministri i Drejtësisë nga PDK-ja, Abelard Tahiri, në mbledhjen e sotme të thirrur nga kryeministri i dorëhequr ka deklaruar se nuk mund të shkohet në zgjedhje.
Ai tha se nuk ka buxhet për organizim të zgjedhjeve.
“Nuk është paraparë të shkohet në zgjedhje prandaj edhe nuk ka buxhet për KQZ-së për organizimin e zgjedhjeve nëse shkojmë në zgjedhje. Nuk mund të shkojmë në zgjedhje pasi që nuk kemi buxhet. E kemi këtu edhe ministrin e Financave që besoj na e qartëson më mire”, tha Tahiri.
Ministri i Financave, Bedri Hamza, i cili edhe para disa muajve kishte deklaruar se nuk ka buxhet për të shkuar në zgjedhje gjatë këtij viti, e ka mbështetur deklaratën e Tahirit.
“Brenda KQZ-së nuk ka fonde për mbajtjen e zgjedhjeve”, tha Hamza.
Zëvendëskryeministri Enver Hoxhaj dhe dy ministrat e PDK-së, kanë kërkuar që partnerët e koalicionit të ulen të bisedojnë dhe të marrin një vendim për shmangien e zgjedhjeve.
Ramush Haradinaj ka dhënë dorëheqje para një jave pasi që është ftuar nga Gjykata Speciale për intervistim.
