Inspektorati i Komunës së Shtërpcës pas një varg protestash nga banorët e disa fshatrave ka ndërprerë përkohësisht punimet në dy hidrocentrale.
Inspektorati komunal ka nisur këtë aksion duke u bazuar në vendimin e Kuvendit komunal të datës 29 shtator të vitit 2016, i cili pezullon përkohësisht punimet e projektit të hidrocentraleve dhe gjithashtu duke u bazuar në një raport të Inspektoratit komunal nga terreni, shkruan sot Koha Ditore.
“Shtyhet deri në kohë të pacaktuar fillimi i punimeve në hidrocentrale në Shtërpcë. Ndërprerja e punimeve do të bëhet deri në zgjidhjen e problemit duke marrë për bazë interesat e përgjithshme të Komunës së Shtërpcës dhe duke ofruar zgjidhjen e ujit të pijshëm”, thuhet midis të tjerash në vendimin e Komunës, me të cilin inspektorati ua ka ndërprerë punimet dy hidrocentraleve.
Ndërkaq në një raport të Inspektoratit të Komunës së Shtërpcës, midis të tjerash, thuhet se njëri nga hidrocentralet gjatë punimit ka turbulluar ujin e pijshëm për banorët e Shtërpcës.
