Këshilltarja politike e ministrit të Jashtëm, Behgjet Pacolli, Elena Osmani, është bërë pjesë e stafit diplomatik.
Elena është vajza e Ismet Osmanit, i njohur si Curri, i arrestuar nën dyshimet për fajde, detyrim dhe mashtrim, në maj të këtij viti.
Elena Osmani është renditur e dhjeta në listën e të përzgjedhurve, me 71.2 pikë.
Një tjetër këshilltare e ministrit Pacolli, Mirlindë Gashi, po ashtu është në listën e zyrtarëve diplomatikë.
Duke qenë pjesë e strukturave të AKR-së, Mirlindë Gashi ka marrë 65 pikë, duke u renditur e 15-ta.
Në këtë listë, një vend në stafin diplomatik e ka zënë edhe Vjosa Sheholli.
Sheholli, për një kohë ka punuar në Zyrën e Komunikimit në Partinë Demokratike të Kosovës, e gjithashtu ishte edhe pjesë e Kryesisë së gruas, në këtë parti.
Sheholli ka qenë edhe kandidate e PDK-së për deputete në Kuvendin e Kosovës.
Ajo është renditur e nënta në këtë listë, me 73.2 pikë.
Ndërkaq, Kushtrim Kokollari është pjesë e Konsullatës së Kosovës në Milano të Italisë, si staf lokal dhe po ashtu është bërë pjesë e stafit diplomatik.
Kokollari është renditur i shtati në këtë listë, me 74.6 pikë.
KTV-ja ka raportuar në maj të këtij viti për këtë konkurs që ishte shpallur nga Ministria e Punëve të Jashtme, ku aplikuesja Alketa Spahiu tha se nuk u ftua as në intervistë, përkundër shkollimit adekuat dhe përvojës së madhe.
Edhe dy këshilltarët e Behgjet Pacollit, Liridon Sadrija dhe Fatmir Haxholli, kishin aplikuar në këtë konkurs, por ata nuk figurojnë në listën e të pranuarve për staf diplomatik./KTV
