Ndonëse po bëjnë përpjekje për formimin e qeverisë së re, LVV-ja e LDK-ja akoma nuk kanë një plan të qartë se çfarë do të bëjnë me projektin “Kosova e Re”. Vetëvendosja shpreson në dështimin e kësaj marrëveshjeje, kurse LDK-ja s’ka një qëndrim të qartë për të, shkruan sot gazeta “Zëri”.
Lëvizja Vetëvendosje dhe Lidhja Demokratike e Kosovës, të cilat dolën parti fituese nga zgjedhjet e 6 tetorit, pritet që shumë shpejt ta formojnë qeverinë e re. Mirëpo as njëra e as tjetra deri më tani nuk kanë një plan se çfarë do të bëjnë me Marrëveshjen me kompaninë “Contour Global” për Ndërtimin e Termocentralit “Kosova e Re”, marrëveshje e cila u arrit më 20 dhjetor të vitit 2017.
Ndonëse LVV-ja që nga fillimi ka kundërshtuar marrëveshjen si të tillë, ata për “Zërin” kanë thënë se vetëm shpresojnë që ky projekt nuk do të gjejë mbështetje financiare e të dështojë në tërësi. Në anën tjetër LDK-ja akoma nuk ka një qëndrim të prerë për “Kosovën e Re”, pasi duan që së pari të shohin marrëveshjen për të parë nëse ka pësuar ndryshime nga koha kur është nënshkruar.
Ndërkohë shoqëria civile po bën presion që të shkëputet kjo kontratë.
