Një objekt katërkatësh i Ministrisë së Bujqësisë, prej pas luftës, është kthyer në seli të Aleancës për Ardhmërinë e Kosovës (AAK), subjekt politik që drejtohet nga kryeministri në detyrë Ramush Haradinaj. E pikërisht në mandatin e Qeverisë Haradinaj, Ministria është zhvendosur nga ndërtesa e ish-Komitetit, në një pronë private për të cilën paguan qira të lartë.
Objekti që e shfrytëzon AAK-ja është i Institutit Bujqësor të Kosovës, i cili funksionon nën kupolën e Ministrisë. Ka bodrumin, katin përdhes dhe dy kate të tjera, me një hapësirë prej rreth 1 mijë metrash katrorë. Ai ndodhet në lagjen “Ulpiana” të Prishtinës, shkruan sot “Koha Ditore”.
Pjesë të madhe të hapësirës AAK-ja mban me një qira fare simbolike, 2.5 euro për metër katror. Kësisoj, kontrata me këtë institucion është 2450 euro për muaj.
Ndërkaq, Ministria paguan më shumë se shtatë fish më shtrenjtë për qiranë ku e ka dislokuar këtë vit stafin. Qiraja që nga shtatori i sivjetmë Ministria paguan për metër katror është 18 euro. Ndërkaq për gjithë hapësirën e kontraktuar, ajo paguan secilin muaj 28.080 euro bruto. Paratë i shkojnë kompanisë “A2 GROUP”, e cila është pronare e hapësirës ku është vendosur Ministria, në ish-ndërtesën “Ramiz Sadiku”, që ndodhet në lagjen “Lakërishte” në kryeqytet.
Kjo nuk është e vetmja qira.
