Hekuran Murati, deputeti i ardhshëm nga radhët e Lëvizjes Vetëvendosje ka reaguar pas mbylljes së IuteCredit dhe Monego-s nga ana e Bankës Qendrore të Kosovës.
Ai përmes një statusi në rrjetin e tij social Facebook, ka thënë se nëse BQK-ja donë ta dëshmojë veten se vepron në bazë të parimeve dhe ligjit, e njëjta duhet që ta trajtojë edhe sektorin e sigurimeve njësoj sikur që bëri dje me dy institucionet mikrofinanciare, Iute Credit dhe Monego, duke ua revokuar licencat.
“Tash, për të dëshmuar që vepron në bazë të parimeve dhe ligjit, BQK do të duhej të trajtonte edhe sektorin e sigurimeve njësoj sikurse bëri dje me iutecredit dhe Monego”, shkroi ai.
Sipas Muratit, kompanitë e sigurimeve, bashkë me Byronë Kosovare të Sigurimeve, kanë shumëfish më shumë shkelje ligjore, në vazhdimësi, por në vend se t’u mirren licencat atyre, ato u shpërblyen edhe me rritje të çmimit.
“Heqja e licencës shkelësve flagrantë e të vazhdueshëm, shkarkimi dhe ndjekja penale e menaxhmenteve të atyre kompanive dhe menaxhmentit të BKS-së, si dhe kthimi i çmimit në nivelin paraprak, janë vetëm hapi i parë drejt normalizimit të këtij sektori”, thuhet më tutje në statusin e Muratit. /Buletini Ekonomik/
