Rreth shtatë muaj pasi Kosova ka shpallur pavarësinë, Gjykata e dikurshme e Qarkut e ka konsideruar shtetin e Serbisë si pronare të mundshme të pronave në Kosovë, shkruan sot Koha Ditore.
Pronat e ndërmarrjeve shoqërore nga paslufta i kanë kaluar në mbikëqyrje Agjencisë Kosovare të Privatizimit (AKP). AKP-ja ligjërisht është institucioni i vetëm që mund ta shesë ose ta japë në shfrytëzim këtë pronë. Megjithatë, në këtë rast nuk është ftuar fare si palë në gjykatë.
Si palë, nga gjyqtarja Olga Janicijeviq, sipas aktgjykimit dhe dokumenteve të tjera që posedon gazeta, është ftuar përfaqësuesi i shtetit të Serbisë dhe përfaqësues i kompanisë “Shipad Comerc”. Pasi këto dy “palë” nuk janë paraqitur në seancë, prona i ka kaluar Zhivkoviqit.
Kjo pronë me sipërfaqe rreth 2 hektarë gjendet në zonën industriale në Prishtinë. Gazeta ka pyetur për çmimin e pronave në atë pjesë. Disa biznese i kanë thënë gazetës se një ari në këtë pjesë sillet prej 25 deri 30 mijë euro. Me një çmim të tillë vlera e kësaj prone tejkalon shumën 5 milionë euro.
Zhivkoviq, serb që jeton në Bosnjë, sipas dokumenteve ekskluzive që ka siguruar “Koha Ditore”, pretendon se shteti i Serbisë ua ka marrë paraardhësve tij këtë pronë gati 80 vjet më parë.
