Deputetja e Lëvizjes Vetëvendosje, Fatmire Kollçaku në një intervistë në emisionin “Përballje ditore” në Telegrafi ka thënë se Ligji i Pagave është ligj elektoral.
Kollçaku duke folur për prioritet e qeverisë së ardhshme ka thënë se, që nga miratimi i këtij Ligji ka pasur shumë parregullsi.
“Është trumbetuar shumë për një Ligj të Pagave, i cili është vendosur një klauzolë që do të filloj së zbatuari në fund të vitit, por që nuk ndodhi. Ne si subjekt i kemi pasur vërejtjet tona për Ligjin, sepse ka pasur shumë parregullsi. Por për sa i përket për punëtorët ne kemi qenë për koeficientin 6 [një koeficient është 239 euro]. Pagat janë rritur njëanshëm dhe është ligj elektoral”, tha Kollçaku.
Ajo ka folur edhe për grevat e paralajmëruar nga sindikatat pas pezullimit të Ligjit për Paga nga Gjykata Kushtetuese, duke thënë se sindikatat duhet të mbrojnë interesin e punëtorëve.
“Për sa i përket sindikatave është se ato duhet t’i kthehen bazës, t’i kthehen njerëzve që kontribuojnë për këto sindikata, të mbrojnë interesin e punëtorit dhe të mos kemi sindikata që më së shumti bashkëpunojnë me pushtetin. Është e padrejtë që këto sindikata t’i adresojnë problemet Qeverisë së re, pasi që këto dy subjekte [LVV dhe LDK] kanë pasur shumë vërejtje dhe nuk e kanë votuar këtë Ligj të Pagave, sepse ka pasur pakënaqësi. Ne jemi për sindikata të forta, sepse e vendos qeverinë në një ankth dhe e di që dikush të vëzhgon për punën tënde”, ka shtuar ajo
Gjithashtu, Kollçaku ka folur edhe për sfidat dhe prioritetet që duhet t’i ketë qeveria e ardhshme në mandatin e saj. /Telegrafi/
