Gjyqtari i Gjykatës Themelore në Prishtinë, Lekë Prenaj, ka konkurruar për t’u avancuar në pozitë. Prenaj nga udhëheqësi i Divizionit Civil në Gjykatën e Prishtinës ka tentuar të bëhet gjykatës i Dhomës së Posaçme në Gjykatën Supreme, shkruan sot “Koha Ditore”.
Prenaj, për të cilin “Koha Ditore” muaj më parë ka raportuar se ka nxjerrë aktgjykim nëpërmjet të cilit ka tjetërsuar jashtëligjshëm pronën e ish-Radiotelevizionit të Prishtinës, siç ka marrë vesh gazeta, nuk është dekretuar nga presidenti Hashim Thaçi.
Një burim i ka thënë gazetës se arsyeja pse nuk është dekretuar ky gjyqtar është vendimi që e ka mundësuar tjetërsimin e jashtëligjshëm të pronës publike.
Gazeta i ka drejtuar pyetje Zyrës së Presidentit, por të mërkurën ky institucion nuk ka kthyer përgjigje.
Se Prenaj është gjyqtari i vetëm që nuk është dekretuar nga presidenti, e ka konfirmuar kryesuesi i Këshillit Gjyqësor të Kosovës, Skënder Çocaj.
