Sot përfundon ultimatumi i kryetarit të Lidhjes Demokratike të Kosovës, Isa Mustafa, për kryetarin e Lëvizjes Vetëvendosje, që ose të pranojë kushtet e tyre për koalicion qeverisës, ose ta shpallin të dështuar marrëveshjen.
Gjatë ditës së djeshme nuk është zhvilluar ndonjë takim ndërmjet Mustafës dhe Albin Kurtit.
Deputetja e Vetëvendosjes, Albulena Haxhiu, ka mohuar se ka pasur takime, derisa ka paralajmëruar se këto dy parti së shpejti do të kthehen në tavolinën e bisedimeve.
Gjatë ditës, është raportuar në media se Kurti dhe Mustafa janë takuar në shtëpinë e këtij të fundit në Prapashticë, mirëpo asnjëra parti nuk e ka konfirmuar zyrtarisht.
Zëdhënësi i LDK-së, Besian Mustafa, ka thënë shkurt për KTV-në nuk ka informacione për këtë çështje.
Deputeti i LDK-së, Haxhi Avdyli, në një postim në Facebook ka lënë të kuptohet se dy partitë janë afër arritjes së marrëveshjes.
Zyrtarët e të dyja partive kanë qenë hermetikisht të mbyllura gjatë së shtunës për të kuptuar nëse liderët e tyre janë takuar apo nëse do të takohen sot.
Afati kushtetues prej 15 ditësh për formimin e Qeverisë me Kurtin mandatar, përfundon në javën e parë të shkurtit.
Mustafa i dha ultimatum Kurtit që deri në fund të kësaj jave, e cila po përfundon sot, të pranojë ose jo ofertën e LDK-së, e cila tashmë gjendet në tavolinën e Kurtit.
E LDK-ja nuk po heq dorë nga kjo ofertë, sipas së cilës, posti i kryetarit të Kuvendit duhet t’i takojë atyre, deri në zgjedhjen e presidentit, pesë minstri, një zëvendëskryeministër dhe një nënkryetar kuvendi.
Por, me këtë ofertë nuk po pajtohet assesi Lëvizja Vetëvendosje e Albin Kurtit, e cila nuk po dëshiron ta heq nga pozita e kryetarit të Kuvendit, njeriun e dytë me të fuqishëm pas Kurtit, Glauk Konjufcën, i cili u zgjodh kryetar në seancën konstituive të Kuvendit me 26 dhjetor.
Sipas krerëve të VV-së, Konjufca është zgjedhur kryetar edhe me votat e LDK-së, prandaj nuk mund të kthehen më mbrapa për ta rizgjedhur një tjetër kryetar Kuvendi.
Përveq ultimatumit të Mustafës i cili përfundon sot, kreut të Vetëvendosjes, po i shkojnë ditët si mandatar për formimin e qeverisë, pas dekretimit të tij si mandatar për propozimin e kabinetit qeveritar në Kuvend, nga presidenti i Kosovës, Hashim Thaçi.
Kurtit i kanë mbetur edhe 10 ditë për të propozuar para deputetëve të Kuvendit përbërjen e kabinetit të ri qeveritar.
Mirëpo, ai ende nuk ka arritur koalicion me LDK-në, për të qeverisur në mandatin e ardhshëm katër vjeçar, duke qenë se ka vënë vija të kuqe për partitë tjera dhe opsioni i vetëm e ka Lidhjen Demokratike të Kosovës.
Gjatë ditës mbetet të shihet nëse Vetëvendosja dhe LDK-ja do të arrijnë pajtimin për të nënshkruar marrëveshjen për bashkëqeverisje.
