Në Konventën e dytë të Prodhuesve të Kosovës, të organizuar nga Klubi i Prodhuesve të Kosovës, kryeministri Albin Kurti theksoi rëndësinë prodhuesve vendorë, i cili tha se prodhuesit janë shtyllë e shoqërisë dhe ekonomisë së Kosovës.
Kryeministri Kurti me këtë rast përsëriti se do të heq tarifën 100 për qind dhe “do të vendosë masat e reciprocitetit për mbrojtjen e prodhuesve vendorë”.
“Ne nuk jemi për tarifa si masë ndëshkuese ndaj konsumatorit por për reciprocitet si masë mbrojtëse ndaj prodhuesve. Produktet që prodhohen në Kosovë e të cilat i nënshtrohen praktikave dhe konkurrencës jolojale do të mbrohen. Posa të vijnë në zyrën time rekomandimet do t’i analizojmë dhe do të marrim vendim për largim të tarifës dhe vendosje të reciprocitetit. Ne jemi shtet i pavarur dhe sovran dhe do të veprojmë si të tillë”, tha Kurti.
Kurti foli edhe për idenë e Mini-Shëngenit, i cili tha se me Shqipërinë do të ketë vetëm bashkëpunim tregtar, sepse siç tha ai, ka vetëm një interes, e ai është bashkëpunim të plotë me Shqipërinë. Edhe drejtues të Klubit Prodhues theksuan se janë kundër Mini-Shengenit.
Kurti po ashtu tha se me Fondin Zhvillimor do të ketë mbështetje për prodhuesit vendorë.
“Nga unë si kryeministër ju do ta keni vëmendjen maksimale, andaj pres nga kjo konventë rekomandimet e juaja që t’i marrim parasysh kërkesat tuaja. Për ndërmarrësit do t’i heqim barrierat e tyre, do të krijojmë barazi për bizneset, do ta luftojmë evazionin fiskal dhe do të sigurojmë energji elektrike me çmim të përballueshëm për prodhuesit. Me Fondin Zhvillimor do të ketë mbështetje për secilin prodhues. Bujqit do t’i mbështesim për sasinë e prodhimit e jo për sipërfaqe. Investime në Kosovë ka pak sepse ka pasur shumë korrupsion që ka frikësuar investitorët potencialë. Sistemi i drejtësisë do të jetë efikas për siguri të bizneseve”, tha Kurti, transmeton kosovapress.
Në hapje të Konventës, kryetari i Klubit të Prodhuesve, Bashkim Osmani tha se ky klub vazhdon të jetë një partner me qeverinë me qëllim të zhvillimit të ekonomik në Kosovë.
“Me qenë sot prodhues në Kosovë është një privilegj i madh, pasi që po gjerojmë vende të reja të punës, jemi kontribuues të buxhetit dhe prodhues të produkteve vendore për qytetarët e Kosovës”, tha Osmani.
Ai kërkoi mbështetjen qeverisë që prodhuesit e Kosovës të jenë sa më shumë në tregjet shqiptare, si në Shqipëri dhe Maqedoni e etj.
Drejtori ekzekutiv i Klubit të Prodhuesve të Kosovës Astrit Panxha foli për brendin dhe fushatën që bënë ky Klub për “Made in Kosova”.
“Ne jemi shumë të interesuar që të vazhdojnë këtë fushatë sepse produktet ‘Made in Kosova’”, janë cilësore”, tha ai.
Ai tha se si prodhuesit janë kundër Mini-Shengenit, derisa tha se sa i përket tarifës, shtoi se qëndrimet e Klubit tashmë janë të njohura.
Ndërsa në Panelin e diskutimit për tregtinë rajonale, do të flasin kryetari i Bordit të Odës së Afarizimit të Kosovës, Skënder Krasniqi, Nagip Fejzi kryetar i Forumit Ekonomik Mbarë-Shqiptarë, Bashkim Sykaj drejtor ekzekutiv i Dhomës së Tregtisë dhe Industrisë në Tiranë, Nebi Hoxha, kryetar i Odës Ekonomike Veri- Perëndimore dhe krye tari i Bordit Drejtues të Bashkimit të Prodhuesve Shqiptarë.
Po ashtu në këtë Konventë, anëtarët e Klubit Prodhuesve, do të nënshkruajnë Kodin e Bizneseve kundër korrupsionit.
Në Konventën e Klubit të Prodhuesve përveç prodhuesve vendorë, po merr pjesë edhe Ministria e Ekonomisë në Kosovë, Rozeta Hajdari.
