Situata e fundit pandemike është duke e rrezikuar edhe funksionalitetin e KEDS-it dhe KESCO-s, shkaku që pagesat për rrymën kanë rënë në minimum, duke e pamundësuar mbulimin e shpenzimeve, ka paralajmëruar zëdhënësi i KEDS-it, Viktor Buzhala.
“Në Kosovë ekziston një zinxhir i kompanive elektroenergjetike të cilat krijojnë kosto secila në bazë të shërbimeve që i ofrojnë. Në fund e tërë barra e shlyerjes së obligimeve bie ndaj KESCO-s, si hallka e fundit dhe KEDS si e parafundit”, shkruan ai në njoftim.
Ai ka bërë të ditur se barra më e madhe ka të bëjë me pagesat e energjisë elektrike, të cilat i pranon KESCO për t’i furnizuar konsumatorët, “të cilat kapin kosto multimilionëshe brenda muajit, energji kjo që pranohet si nga KEK, ashtu edhe nga prodhues tjerë”, transmeton KOHA.
“Të njëjtën kohë, energjia elektrike vendore shpesh nuk mjafton, duke detyruar kompaninë të importojë për t’i plotësuar nevojat e konsumatorëve. Pastaj kosto tjetër e shtuar është edhe ajo e transmisionit. Në fund janë operimet e vet kompanisë, duke e pasur parasysh mirëmbajtjen dhe invesimet në rrjetin distributive, pagesat për rreth 2200 punëtorë e shenzimet tjera operative”, shkruan ai.
Rrjedhimisht, si ka thënë ai, pagesa e energjisë elektrike është jetike për mbarëvajtjen e furnizimit. Buzhala u ka bërë apel të gjithë konsumatorëve që t’i paguajnë obligimet e tyre. në mënyrë që të ruhet kontinuiteti i shërbimeve.
“Energjia elektrike është jetike në këto kohë të vëshira që po kalon vendi dhe në përballimin e kësaj situate involvimi i të gjithë akterëve është i domosdoshëm. Në presim zgjidhje dhe mbështetje edhe nga Qeveria e Kosovës, pasi situata e pagesave është rënduar së tepërmi pas tendencës për shtyerje të pagesave në bazë të deklarimeve publike të bëra po nga qeveria”, shkruan ai.
