Kryetari i LDK-së, Isa Mustafa, pas mbledhjes ka deklaruar se kanë marrë përkrahja nga Këshilli i përgjithshëm për formimin e koalicionit me AAK-në, AKR-në, Nismën dhe dy parti të pakicave joshqiptare.
Ai tutje ka shtuar se presin që Vetëvendosje ta pranojë ose ta refuzojë mandatarin për Qeverinë.
“Ne konstatuam bashkërisht që kemi marrë një përkrahje të gjerë të Këshillit të Përgjithshëm, të cilët kanë votuar pro për koalicion me AAK, Nismën dhe AKR-në dhe dy grupe të partive joshumicë”, ka thënë ai.
Mustafa tutje ka shtuar se nëse LDK-ja do ta drejtonte një Qeveri, hapi i parë do të ishte heqja e reciprocitetit.
Sipas tij kjo për t’i hapur rrugë dialogut, duke shtuar se, nëse Serbia nuk reflekton do të kthehej një reciprocitet i plotë ekonomik dhe politik.
I pari i LDK-së ka thënë se ekziston përkrahja për koalicion, duke shtuar se nuk ekziston vendimi për të.
Ai thotë se një gjë e tillë ndodh kur LDK-së t’i ofrohet mundësia për formimin e Qeverisë.
“Deri atëherë presim që VV ta pranojë ose refuzojë mandatin për këtë dhe të mos sillet në prolongimin e deklarimit të saj dhe po ashtu kjo varet edhe nga partnerët tanë, sepse ne do ta bëjmë një qeveri që nuk ka brenda njerëz që kanë probleme me ligjin.
Ne tani konstatuam se kemi disponim gjithmonë duke bërë kërkesa që të kemi njerëzit më të mirë në Qeveri, më profesional dhe që jemi të gatshëm ta pranojmë këtë sfidë por gjithmonë duke ndjekur hapat kushtetues”, ka thënë ai.
Ai ka shtuar se janë të interesuar që vendi të mos vazhdojë gjatë me këtë qeveri në detyrë sepse, sipas tij, shumë marrëveshje kërkojnë ratifikim në kuvend.
Ndërkaq duke folur për kryetaren e Kuvendit, Vjosa Osmani, ai ka thënë se ajo ka dhënë qëndrimin e saj kundër mocionit të mosbesimit dhe kundër koalicionit.
“Zonjën Osmani nuk e përjashtojmë sepse ajo i ka dhënë qëndrimet e saj në mënyrë publike. Qëndrimi i saj ka qenë që është kundër mocionit të mosbesimit dhe ka deklaruar që nuk është pro koalicionit. Emrin për kryeministër nuk e kemi akoma, kur të vie puna për marrjen e mandatit do ta sqarojmë”, ka thënë ai.
