Kryeministri në detyrë i Kosovës, Albin Kurti, deklaroi se kalendari i takimeve të ardhshme me Serbinë varet nga Brukseli.
Kurti u shpreh se do të jetë ai që do të përfaqësojë Kosovën në dialog, pasi ka edhe një vendim të gjykatës që thotë kryeministri përfaqëson vendin në dialog.
Kryeministri në detyrë tha se kanë përvojë dhe se do t’i mbrojnë interesat e vendit në dialog me Serbinë.
“Unë jam në kontakt të rregullt me përfaqësuesin e BE-së, Miroslav Lajçak. Ai natyrisht që është duke përgatitur fillimin e dialogut. Ne kërkojmë që ky dialog të jetë me parime dhe i përgatitur, i organizuar mirë. Jemi gati, kemi përvojë, do t’i mbrojmë interesat e shtetit tonë dhe do ta përfaqësojmë Republikën e Kosovës ashtu siç e thotë Kushtetuta, ashtu siç e thonë ligjet tona dhe ashtu siç na njeh populli i Kosovës. Pra, varet prej Brukselit kalendari i dialogut të ardhshëm dhe në bazë të Kushtetutës të Republikës së Kosovës dhe aktgjykimit nga viti i kaluar Kosovën e përfaqëson kryeministri i saj”, deklaroi Kurti pas vizitës në Therandë, transmeton kp.
Përfaqësuesi i Bashkimit Evropian, Miroslav Lajçak deklaroi se dialogu mes Kosovës dhe Serbisë do të fillojë së shpejti.
