Procesi i liberalizimit të vizave për qytetarët e Kosovës është mundësia e vetme që institucionet t’i përmbushin detyrimet kontraktuale që i kanë me Bashkimin Evropian (BE).
Por sipas zëvendësministrit në detyrë të Integrimit Evropian, Taulant Kryeziu, një gjë e tillë nuk ka ndodhur nga qeveritë e kaluara, ku sipas tij, Marrëveshja e Stabilizim Asociimit, nuk është përmbushur në nivel të kënaqshëm.
“Ne e shohim procesin tonë drejt rrugëtimit në Bashkimin Evropian, i cili është një përcaktim i joni strategjik. Bashkimi Evropian mbetet adresa e jonë ku ne mëtojmë një ditë të bëhemi pjesë e familjes së madhe evropiane, mirëpo kjo rrugë për t’u trasuar në mënyrë të drejtë, është që ne duhet t’i përmbushim ato detyrime kontraktuale që i kemi me Bashkimit Evropian, e cila e para është marrëveshja e Stabilizim Asociimit, e cila fatkeqësisht nuk është përmbushur në nivel të kënaqshëm nga qeveritë e kaluara”.
Kryeziu për Ekonomia Online, ka thënë se qeveritë e kaluara marrëveshjen për MSA-në e kanë zbatuar vetëm 50 për qind, por që premton se kjo marrëveshje do të zbatohet në tërësi.
“Vitin e kaluar, nga të dhënat që vijnë nga Qeveria e kaluar, se vetëm 50 për qind e planit për zbatimin e MSA-së është implementuar. Ne jemi në fazën përfundimtare të përgatitjes së këtij programi, i cili duhet të votohet në qeveri dhe do të jemi të kujdesshëm në mbikëqyrjen e zbatimit të të gjitha detyrimeve dhe kritereve të cilat i kanë të parapara ministritë e linjës”, tha ai.
Ndryshe nga pasardhësit e tij që jepnin data rreth liberalizimit të vizave, një gjë të tillë nuk e praktikon Kryeziu. Ai thotë se për këtë proces po punojnë ditë e natë.
“Po ashtu për t’u lidhur me procesin e vizave, që besoj është proces shumë më rëndësi për qytetarët e Kosovës, proces që janë torturuar kosovarët që mundohemi të jemi të kujdesshëm në dhënien e afateve, por po punojmë pa reshtur çdo ditë, e shtunë e diele, që t’i bindim vendet hezituese që me sundimin e ligjit e kemi prioritet jashtëzakonisht shumë dhe ku do të ndërtojmë një shoqëri që të gjithë jemi të barabartë para ligjit”, tha Kryeziu.
Kryeziut thotë se me marrjen e mandatit, puna e parë e udhëheqësve të këtij dikasteri ka qenë punësimi i studentëve përmes bursës “Celula e të Rinjve”.
Ai thotë se kanë arritur gjithashtu që t’i largojnë nga objektet me qira stafin e tyre, që sipas tij, arrijnë që t’i shpëtojnë buxhetit të shtetit 300 mijë euro, raporton EO.
“Me marrjen e detyrës Ministri të Integrimit, gjëja e parë ka qenë rikthimi i ligjit brenda institucionit. Ne kemi larguar objektet që kanë qenë me qira gjithë stafin ton, që kostoja vjetore ka kaluar 300 mijë euro”.
“Poashtu, i kemi dhënë frymëmarrje bursës ‘Young Cell’ apo ‘Celula e të Rinjve’, ku të rinjtë tanë kanë qenë përfitues të kësaj burse nuk janë punësuar, mirëpo ka pasur një politizim brenda administratës dhe ne jemi munduar dhe kemi dhënë garanci se të gjithë ata të cilët janë përfitues të kësaj burse të bëhen pjesë e institucioneve siç e parasheh kontrata”, u shpreh ai.
