Bashkëkryesuesi i Këshillit Evropian për Marrëdhënie të Jashtme, Carl Bildt, nuk do të habitej nëse përpjekjet për të zhbërë Gjykatën Speciale do të shtoheshin tash, kur janë ngritur aktakuzat për presidentin e vendit Hashim Thaçi dhe kreun e Partisë Demokratike të Kosovës, Kadri Veseli.
Ai përmes Twitterit ka pyetur kryeministrin Avdullah Hoti, se pse pikërisht në këtë kohë, para takimit Kosovë – Serbi, që ishte paraparë për 27 qershor në Washington, Prokurori Special ka publikuar aktakuzën.
“Pse Prokurori Special vendosi që tash, papritmas, të bëjë publike aktakuzën kundër presidentit të Kosovës, Thaçi? Ndoshta ai kishte indikacione se Thaçi po përpiqej të mobilizonte Shtëpinë e Bardhë për të mbyllur Gjykatën Speciale. Unë nuk do të habitem nëse përpjekjet e tilla tash do të intensifikohen”, ka shkruar Bild, ish-kryeministër dhe ish-ministër i Punëve të Jashtme të Suedisë.
Në fakt, Prokuroria e Dhomave Speciale e nxori në publik njoftimin për akuzat, për shkak të siç tha “përpjekjeve të përsëritura të Hashim Thaçit dhe Kadri Veselit për pengimin dhe sabotimin e punës së DHSK-së”.
