Instituti ekonomik, Ifo, ka thënë të mërkurën se ekonomia e Gjermanisë do të rimëkëmbet në mënyrë graduale pas rënies historike të shkaktuar nga pandemia e koronavirusit.
Sipas këtij instituti, ekonomia gjermane pritet të kthehet në nivelin e vitit të kaluar në fund të vitit të ardhshëm, shkruan “Reuters”, transmeton Gazeta Express.
Instituti Ifo pret që prodhimi vendor të tkurret për 11.9 për qind gjatë çerekut të dytë të vitit, krahasuar me periudhën janar-mars, ndërsa do të rritet për 6.9 për qind në çerekun e tretë dhe 3.8 për qind në çerekun e katërt.
“Nga tash e tutje, gjërat janë duke u përmirësuar gradualisht përsëri”, tha ky institut, por shtoi se situata është e paqartë për shkak të pandemisë dhe reagimit politik ndaj saj.
Ky institut vlerësoi se ekonomia e Gjermanisë këtë vit do të tkurret për 6.7 për qind, ndërsa do të rritet për 6.4 për qind në vitin 2021.
