Komuna e Prishtinës pret që gjatë kësaj jave të mbërrijnë testet e para serologjike, përparësi e të cilëve janë rezultatet të cilat bëhen të ditura brenda 15 minutave e që ndihmojnë në zbulimin e rasteve me Covid-19.
Kështu ka bërë të ditur, nënkryetari i Komunës së Prishtinës, Muhedin Nushi, i cili në një intervistë për KosovaPress konfirmon se të parët që do të testohen janë punëtorët e këtij institucioni.
Ai tha se tashmë kanë pasur kontakte me disa kompani si dhe ambasada të huaja të akredituara në vendin tonë rreth mundësisë që një sasi e këtyre testeve të vijnë edhe si donacion.
“Komuna e Prishtinës është në biseda me disa prej kompanive ku kemi pas edhe oferta prej disa ambasadave që të marrim si donacion këto teste të shpejta, që shkojnë nëpërmes marrjes së gjakut, ku brenda 10-15 minutave merret rezultati. Ne po shpresojmë që gjatë kësaj jave të marrim sasinë e parë të testeve dhe sipas diskutimit me kryeministrin javën e kaluar, jemi zotuar se testet e para do t’i bëjmë te punëtorët e komunës”, shprehet Nushi. “Ne tash e kemi situatën jo të mirë në komunën e Prishtinës, 18 punëtorë shëndetësorë nga QKMF dhe nga qendra kryesore janë të infektuar me Covid-19, ndërsa 54 tjerë në vetëizolim, në anën tjetër në Komunë të Prishtinës veçse i kemi 3 persona pozitivë, jemi duke i respektuar vendimet e qeverisë për reduktim të stafit, në mënyrë që pjesa e stafit tjetër të mos preket”.
Nushi ka shtuar se përkundër rritjes së numrit të personave të infektuar kjo komunë është në gjendje të menaxhojë situatën. Derisa thotë se pas 2 jave presin stabilizim të numrit të të infektuarve.
Sa i përket rikthimit të kufizimit të lëvizjes dhe mbylljes së gastronomisë prej orës 21:00 deri në ora 05:00, Nushi e pranon se do të sjellë probleme për ekonominë.
“Numri këto 2 javë është në rritje e sipër, jemi në gjendje të menaxhojmë situatën përkundër rritjes së numrit, por që deri te kjo rritje ka ardhur nga mosrespektimi i rekomandimeve. Andaj ne vet si qytetar kemi ardhur te kjo situatë, kur kemi pasur obligim vetëm 2 masa t’i aplikojmë bartja e maskave dhe respektimi i distancimit social prej 1 metër e gjysmë deri në 2 metër”, thotë Nushi.
Ai ka shtuar se, “masat të cilat kanë hyrë në fuqi me vendim të Qeverisë, do të shkaktojnë probleme në ekonominë e qytetit posaçërisht në pjesën e gastronomisë, por që të gjitha këto masa që kanë filluar të aplikohen, janë më tepër masa restriktive. Pas 2 jave po presim që të ketë stabilizim të numrit të të infektuarve, duhet të mësohemi me këtë virus”.
Me fillimin e pandemisë, Komuna e Prishtinës, u lavdërua për punën në dezinfektimin e rrugëve dhe hapësirave publike si dhe objekteve banesore. Mirëpo, tashmë që numri sërish është në rritje, nuk ka buxhet që një aksion i tillë të vijojë.
Kjo sipas Nushit për shkak të buxhetit ndërsa ftoi qytetarët që të organizohen vet dhe të dezinfektojnë hyrjet e banesave.
“Këto lloje të dezinfektimeve në banesa, ndërtesa të cilat janë me numër të madh nuk janë të parapara sepse duhet të ndahen mjete buxhetore nga rishikimi i buxhetit për të cilat duhet të jemi të sinqertë se nuk i kemi ato mundësi që i kemi pasur në muajin mars, prill, maj, duke u bazuar në vendimin e komisionit rregullativ të prokurimit publik, i cili na pati lehtësuar nënshkrimin e kontratave me operatorët ekonomikë në procedurë shumë të shpejtuar, tash më ai vendim është shfuqizuar. Prandaj edhe sikur të dalim tash me tender, ai zgjat dhe nuk kemi mundësi të intervenojmë shpejtë. Qytetarët mund të organizohen vet përmes kompanive të caktuara. Ne jemi duke e bërë dezinfektimin e objekteve të Komunës së Prishtinës, por tash për tash për objekte banesore nuk janë të parapamë mjetet e mjaftueshme për dezinfektim”, thotë ai.
Ndryshe, Prishtina është bërë qyteti i parë vend që ka tejkaluar shifrën e mbi 1 mijë rasteve pozitive me COVID-19.
