Drejtuesit e komunave kanë vlerësuar se kufizimi i lëvizjes në qendrat kryesore dhe kufizimi i punës së gastronomisë nuk kanë dhënë rezultat në luftën ndaj përhapjes së COVID-19. Komunat, përmes Bordit të Asociacionit të Komunave, kanë kërkuar rishqyrtim të masave. Komunat kanë kërkuar që të hiqet orari i kufizimit të lëvizjes.
Asociacioni i Komunave ka vlerësuar se situata me COVID-19 vetëm është keqësuar. Ky asociacion i ka dërguar një letër ministrit të Shëndetësisë, Armend Zemaj dhe ministrit të Punëve të Brendshme, Agim Veliu.
Në letër thuhet se është koha për rishqyrtim të masave që janë në fuqi prej 5 korrikut “marrë parasysh që atë ditë ishin 3508 raste kurse më 23 korrik numri ka shkuar në 6467 raste”.
“Po shihet qartë që masat e parapara më 5 korrik nuk kanë dhënë efektin e dëshiruar dhe që këto masa duhet të rishqyrtohen. Kufizimi i lirisë së lëvizjes në komunat kryesore dhe masat që janë ndërmarrë për sektorin e gastronomisë (koha e aktivitetit të jetë e kufizuar nga ora 21:00 deri në pesë të mëngjesit), nuk paskan qenë masa përkatëse për parandalimin e përhapjes së COVID-19. Prandaj kërkojmë që të hiqet orari i kufizimit të lëvizjes dhe të niset me lirimin e disa masave për gastronominë. Kërkohet që masat të rishikohen në mënyrë që parandalimi i përhapjes së COVID-19 të jetë më i suksesshëm”, thuhet në letrën e Asociacionit të Komunave të Kosovës.
Drejtuesit e komunave vlerësojnë se masat që janë në fuqi nuk kanë ndikuar në uljen e numrit të infektuarve, por po ndikojnë në ekonominë vendore. Sipas letrës, ndërmarrjet e vogla dhe të mesme janë duke shkuar drejt falimentimit.
