Plot 176 mijë euro të taksapaguesve janë shpenzuar kot nga Ministria e Bujqësisë, në një tender që kishte synim përkrahjen e fermerëve kosovarë. Kështu konstaton Auditori i Përgjithshëm në raportin e auditimit për këtë ministri të vitit 2019.
Për tenderin ishte angazhuar kompani private, ani pse ministria ka kapacitete dhe staf për t’i kryer vetë këto punë, përcjellë Buletini Ekonomik.
“Kontrata “Përkrahja e Fermerëve për analiza të tokës, trajnime, këshillime dhe rekomandime për rezultatin e analizave të tokës” ishte nënshkruar me datë 22.06.2018 në vlerë 176,199€ me një operator ekonomik, përkundër faktit që analizat e tilla mund të realizohen nga Instituti Bujqësor i Kosovës që operon në kuadër të ministrisë”, thuhet në raportin e Auditorit.
Kjo kishte ndodhur për shkak të vendimit të gabuar të menaxhmentit të MBPZHR-së për kontraktimin e kryerjes së këtyre shërbimeve.
Sipas Auditorit, mos shfrytëzimi i resurseve njerëzore dhe teknologjike të cilat posedon Instituti Bujqësor dhe lidhja e kontratave me operator ekonomik privat ndikon në shpenzimin e pa arsyeshëm të fondeve buxhetore.
“Ministri duhet të shqyrtoj arsyet dhe nevojën për prokurimin e shërbimeve të cilat ka mund t’i kryej vet IBK-ja, si dhe të siguroj se para inicimit të çdo aktiviteti të prokurimit, merret parasysh neni 9.4 i LPP-së në mënyrë që të mos kontraktohen jashtë shërbimet të cilat mund t’i kryejnë organet/institutet që operojnë brenda vet ministrisë”. /Buletini Ekonomik/
