Për mocionin e ngritur nga Lëvizja Vetëvendosje për rrëzim të qeverisë Hoti, nuk ka vota për të dhënë Nisma Socialdemokrate e cila është pjesë e këtij koalicioni qeverisës.
Kështu ka deklaruar deputeti i Nismës Socialdemokrate, Endrit Shala i cili tha se Lëvizja Vetëvendosje ka të drejtë të inicioj mocion për rrëzim të qeverisë.
“Lëvizja Vetëvendosje ka të drejtë me nis një mocion, është e drejtë e tyre me nis mocion. Nisma Socialdemokrate është pjesë e këtij koalicioni qeverisës dhe nuk e përkrah një mocion të tillë të ngritur nga Lëvizja Vetëvendosje”, tha ai për KosovaPress.
Nga sot Lëvizja Vetëvendosje ka nisur mbledhjen e nënshkrimeve për rrëzim të koalicionit qeverisur në krye me Avdullah Hotin. Për këtë mocion mosbesimit në PDK thonë se ende nuk kanë qëndrim.
Ndryshe, përkundër përçarjeve të fundit ndërmjet Lidhjes Demokratike të Kosovës dhe Aleancës për Ardhmërinë e Kosovës, kjo e fundit e cila është pjesë e këtij koalicioni qeverisës nuk pritet ta përkrahë mocioni për rrëzimin e qeverisë Hoti.
Madje në këtë parti nuk besojnë se Lëvizja Vetëvendosje do t’i sigurojë votat për rrëzim të qeverisë aktuale.
E në Partinë Demokratike të Kosovës ende nuk kanë qëndrim se a do ta përkrahin këtë mocion apo jo.
