Shtetasit e huaj që jetojnë në Zvicër përbëjnë gati 25 përqind të popullsisë së vendit. Shifrat zyrtare zbulojnë shumë fakte interesante rreth këtyre njerëzve.
Ky informacion është edhe më i rëndësishëm përpara referendumit mbarëkombëtar më 27 Shtator, i cili kërkon të kufizojë numrin e emigrantëve të BE-së që vijnë në Zvicër.
Sa shtetas të huaj jetojnë në Zvicër?
Shifrat e lëshuara nga Sekretariati Shtetëror për Migracionin (SEM) tregojnë se 18,386 të huaj erdhën në Zvicër midis janarit dhe marsit 2020, që është 3,013 njerëz më shumë se në të njëjtën periudhë të vitit të kaluar, shkruan The Local, përcjell albinfo.ch.
Sipas Zyrës Federale të Statistikave, nga 2,176 milionë shtetas të huaj që jetojnë në Zvicër, shumica – rreth 1,434 milionë – vijnë nga vendet e BE dhe EFTA.
Të tjerët (rreth 248,000 në total) janë nga vendet jo-BE si Kosova, Maqedonia dhe Turqia. Sipas statistikave më të reja në Zvicër jetojnë 114.248 persona me shtetësi kosovare. Përqindja e tyre në numrin e përgjithshëm të të huajve është 5.4%.
Emigrantët nga Afrika, Amerika (Veriu dhe Jugu) dhe Azia arrijnë në rreth 365,000.
Popullsia totale e Zvicrës është pak më shumë se 8.5 milionë, përcjell tutje albinfo.ch.
Cilat janë kombësitë kryesore të të huajve të Zvicrës?
Të parët për nga numri janë qytetarët italianë me 325.88 veta (15.3%), pas të cilëve vijnë shtetasit gjermanë (310.453 ose 14%), ata portugezë (263.168 ose 12%), francezët (141.784 ose 6.7% ).
Afërsisht 42,000 britanikët që jetojnë në Zvicër nuk llogariten në statistikat e BE që nga dalja e MB nga blloku evropian.
Në cilat vende në Zvicër jetojnë të huajt?
Një studim i publikuar në qershor nga Universiteti i Gjenevës gjeti “një prani të fortë të huaj” në dhe rreth qyteteve të mëdha, të cilat janë afër qendrave ekonomike dhe mundësive të punësimit – të tilla si brigjet e Liqenit të Gjenevës ose Liqenit të Cyrihut.
Përqendrimi më i lartë i të huajve (62.4 përqind) mund të gjendet në periferinë Crissier të Lozanës, sipas studimit, përcjell tutje albinfo.ch.
Nga ana tjetër, numri më i ulët i shtetasve të huaj është në Röthenbach, në rajonin Emmental të Kantonit të Bernës, ku ka vetëm 37 të huaj midis 1,172 banorëve.
Shpërndarja e kombësive të ndryshme në të gjithë Zvicrën ndryshon shumë dhe në shumë raste bazohet në gjuhë dhe në gjeografi. Për shembull, gjermanët, francezët dhe italianët jetojnë kryesisht në rajonet e tyre përkatëse gjuhësore.
Portugezët dhe turqit zakonisht janë të përqendruar në lagje me strehim relativisht të lirë, pavarësisht nga kantoni, zbuluan studiuesit.
Pse vijnë emigrantët në Zvicër?
Sipas hulumtimit nga Universiteti i Neuchâtel, shumica (36 për qind) vijnë për punë ose arsimim.
Duke parë vendet individuale, përqindja e atyre që imigrojnë për arsye profesionale është 50 për qind për shtetasit e BE dhe EFTA, 46 për qind për MB dhe 40 për qind për Amerikën e Veriut.
Ku punojnë qytetarët e BE-së në Zvicër?
Universiteti i Neuchâtel tregoi se 60 për qind e emigrantëve punojnë në ‘profesione elementare’, të përcaktuara si ‘detyra rutinë të cilat kryesisht kërkojnë përdorimin e mjeteve të dorës dhe shpesh, përpjekje fizike’.
Gati 50 për qind janë të punësuar në fabrika, 40 për qind në zeje dhe 30 për qind në shërbime dhe shitje.
Një e katërta ose më pak kanë punë të nivelit menaxherial ose konsiderohen si ‘profesionistë’, që do të thotë se punët e tyre kërkojnë një diplomë.
Fakte të tjera interesante:
- Mbi 37 për qind e popullsisë së Zvicrës kanë prejardhje migrimi; 24 për qind e tyre kanë shtetësi të huaj, ndërsa pjesa tjetër janë zviceranë ose nga lindja ose nga natyralizimi.
• Në vitin 2018, vitin e fundit për të cilin janë në dispozicion të dhëna, mbi 967,000 të huaj u dha shtetësia zvicerane. Pasi të natyralizohen, këta njerëz nuk tregohen më në statistika si banorë të huaj.
