Çmimet e druve në Kosovë kanë shënuar një ngritje në krahasim me muajt e kaluar për shkak të sezonit të dimrit.
Aktualisht, një metër dru i llojit bung kushton prej 33 deri 43 euro varësisht nga rajoni.
Buletini Ekonomik ka kontaktuar me disa druvarë të rajoneve të ndryshme të Kosovës, të cilët kanë pasqyruar çmimet e druve, varëasisht prej llojeve të tij.
Kështu rajoni i Istogut po del të jetë më i liri sa i përket çmimeve për metrin e druve.
B.Z, njëri nga druvarët në Istog, ka treguar se aktualisht një metër dru i llojit bung kushton rreth 33 euro në këtë rajon.
Sipas tij, çmimet kanë shënuar ngritje në krahasim me muajt qeshor dhe korrik të këtij viti.
Çmimi i po këtij lloji gjatë këtyre dy muajve ka kushtuar 27 euro për metër me një diferencë prej 6 eurosh më lirë.
Ndërkaq, në rajonin e Prishtinës çmimet janë më të larta. Druvari B.G, ka thënë se çmimet për metër të druve levizin prej 40-43 varësisht nga lloji i tij.
“Bungu aktualisht shitet më së shtrejti në këtë rajon diku deri 43 euro për metër” tha druvari i kryeqytetit.
Sipas tij, çmimet në krahasim me muajin qershor kanë lëvizur prej 1 deri në 3 euro më shtrenjtë për metër.
Rajoni i Gjilanit, çmimin për metër të druve e ka prej 38 deri në 40 euro.
Edhe njëri prej druvarëve të këtij rajoni pohoi të njejtën gjë, që muajt e kaluar ka qenë një çmim më i volitshëm për blerje të druve.
Ai tha se përafërsisht një metër dru në muajt qershor-korrik është shitur diku 30 euro. Çmim pothuajse të njejtë kanë deklaruar edhe nga Suhareka.
L.B ka shtuar se aktualisht një metër dru në Suharekë po shitet 40 euro. (Blendrita Avdiu)/Buletini Ekonomik/
