Ministri i Bujqësisë, Pylltarisë dhe Zhvillimit Rural, Besian Mustafa mori pjesë sot në samitin virtual të Miqve të Evropës, BE-Ballkani Perëndimor 2020. Samiti organizohet që të diskutohen çështjet më urgjente me të cilat ballafaqohet sot Ballkani Perëndimor.
Duke u përqendruar në mundësitë e krijuara nga digjitalizimi në bujqësi, ministri Mustafa tha se bashkë me rajonin dhe të gjithë Botën, duke përdorur digjitalizimin, Kosova po hapëron drejt arritjes së qëllimeve të zhvillimit të qëndrueshëm (SDG).
“Ministria e Bujqësisë, por edhe Qeveria të cilën e përfaqësoj, ka për qëllim që përmes modernizimit të teknologjisë dhe përkrahjes ndaj fermerëve për t’u pajisur me softuerë për menaxhimin e fermave, përmes subvencionimit të mjeteve dhe teknologjive dhe aftësimit të fermerëve që t’i përdorin ato shërbime, të instalojmë E-bujqësinë edhe në Kosovë”, tha Mustafa.
Fokusi i samitit, ku morën pjesë përfaqësues të lartë të vendeve të rajonit dhe më gjerë, është bashkëpunimi rajonal dhe forcimi i ekonomisë dhe tregut të punës përmes transformimit të gjelbër dhe digjital, arsimit dhe sipërmarrjes dhe përfshirjes.
Në samit u diskutua gjithashtu edhe mbi bashkëpunimin rajonal për rimëkëmbje ekonomike pas pandemisë Covid-19.
