Suedia do të zhvillojë një certifikatë elektronike të vaksinimit kundër COVID-19 për udhëtime dhe përdorime të tjera, njoftoi sot qeveria suedeze, pas një vendimi të ngjashëm nga Danimarka.
Të dy mbretëritë nordike kanë treguar se këto çertifikata do të synojnë udhëtimet jashtë vendit, por që mund të përdoren potencialisht për të hyrë në ngjarje sportive ose kulturore apo edhe në restorante, raporton Dpa, përcjell Albinfo.ch.
“Me një certifikatë dixhitale të vaksinimit do të jetë e shpejtë dhe e lehtë të vërtetosh një vaksinim të plotë”, argumentoi ministri suedez për Dixhitalizimin, Anders Ygeman.
Qeveria suedeze synon ta nisë këtë projekt në qershor.
Danimarka, e cila e njoftoi dje programin e saj të “pasaportës korona”, ka në plan të publikojë së pari një regjistër në internet, për të kontrolluar statusin e imunizimit të një personi.
Pas krijimit të këtij regjistri, i planifikuar për në fund të shkurtit, një zgjidhje teknike më e përparuar pritet të vendoset brenda tre deri në katër muaj, sipas qeverisë.
Danimarka do të marrë vendimin e saj përfundimtar mbi përdorimet e sakta të pasaportës pas studimeve të reja në lidhje me infektimin e personave të vaksinuar.
