Ministria e Arsimit ka premtuar mësimin dual në shkolla që nga viti i ardhshëm që përfshin edhe bashkëpunimin me kompanitë vendore për përgatitjen e nxënësve.
Mësimi dual nënkupton që aftësimi në një kompani kombinohet me një lëndë të një shkolle profesionale.
Kompanitë janë të gatshme për këtë lloj bashkëpunimi, por kanë disa kushte.
“Do të ishte më efikase të fillohet me industrinë e IT-së, pasi edhe kërkesa për këtë sektorë është e madhe. Mirëpo Qeveria duhet ta ketë parasysh që kostoja e aftësimit të këtyre nxënësve është shumë e lartë për ta bartur kompania, kështu që është me rëndësi që Qeveria të ketë mbështetje edhe për kompanitë”, deklaroi përfaqësuesi i një biznesi, Faton Sopa.
Fjolla Ismaili nga Oda e Afarizmit thotë se aplikimi i mësimit dual do ta ulte nivelin e papunësisë në vend, përcjell Telegrafi.
“Ne konsiderojmë se aplikimi i sistemit dual do ta ulte nivelin e papunësisë në vend. Pas memorandumit me Ministrinë e Arsmit, ne kemi filluat të hulumtojmë për të parë se cilat janë kërkesat e tregut për të bërë orientimin e studentëve në ato profesione të cilat janë të nevojshme’, deklaroi Fjolla Ismaili.
Edhe njohësit e çështjeve të arsimit po thonë se ky sistem duhet të përkrahet, por kërkojnë më shumë detaje.
“Fillimi i mësimit dual është një ide që duhet të përkrahet, por para se të ketë një ide të tillë duhet një analizë gjithëpërfshirëse nëse komuniteti i biznesit mund të ofrojë një mësim të tillë për të gjitha shkollat. Pra a ka kapacitete biznesi në tërësi dhe a janë të vetëdijshëm për kurrikulat që zbatohen në arsimin profesional dhe ndërlidhshmërinë e tyre me tregun e punës”, deklaroi eksperti i arsimit Mirlind Behluli.
Ndryshe, arsimi dual nuk është përfshirë në planin qeverisë të Qeverisë Kurti 2.
