Dëshmitari Blerim Krasniqi ka thënë se kompania ku ai punon kishte investuar rreth 7 milionë euro në Hidrocentralin e Lumbardhit.
Këtë deklarim ai e ka dhënë të enjten në Gjykatën Themelore në Prishtinë në rastin “Afera e Hidrocentraleve” ndaj katër ish-ministrave të Qeverisë Thaçi 2, Besim Beqaj, Mimoza Kusari-Lila, Dardan Gashi dhe Nenad Rashiq, si dhe dy të akuzuarve të tjerë Fëllanza Hoxha dhe Arben Gjuka.
Për këtë rast, Besim Beqaj, Mimoza Kusari-Lila, Dardan Gashi dhe Nenad Rashiq, si dhe Fëllanza Hoxha e Arben Gjuka po akuzohen nga Prokuroria Speciale e Republikës së Kosovës (PSRK) se kanë keqpërdorur pozitën e tyre zyrtare, me rastin e privatizimit të distribucionit të shpërndarjes së Korporatës Energjetike të Kosovës.Gjatë përgjigjeve në pyetjet e prokurorit special, Atdhe Dema, dëshmitari Krasniqi ka mbetur në tërësi pranë deklaratës së dhënë në polici më 29 maj 2018, raporton “Betimi për Drejtësi.
Krasniqi tha se ai punon si menaxher i financave në kompaninë “Triangle General ContractorS-INC”. Sipas tij, kjo është degë e “Triangle” në New York e cila në Kosovë merret veçanërisht me ndërtimin dhe rindërtimin e hidrocentraleve.
Siç tha Krasniqi, Korporata Energjetike e Kosovës (KEK) në atë kohë kishte hapur tenderë për rindërtimin e hidrocentraleve, dhe në bazë të kritereve që KEK-u kishte caktuar, kjo kompani kishte konkurruar dhe në konkurrencë i kishte plotësuar kushtet me ç’rast ishte shpallur fitues. Lidhur me procedurën e koncesionit të hidrocentraleve, dëshmitari ka treguar se ka qenë përgjegjës për financa dhe nuk i dinë detajet për rrjedhën e kësaj procedure./Media Ndërtimi/
