Sot fermerët nga të gjitha anëet e Kosovës nga ora 11:00 janë duke protestuar para ministrisë së bujqësisë me kërkesat e tyre për heqjen e kritereve të reja lidhur me subvencionet e grurit.
Ata marshuan para kësaj ministrie me rreth 200 traktorë ku sipas tyre gati 80 për qind e bujqve do të mbesin pa të drejtë aplikimi dhe kësisoj nuk do të fitojnë asgjë nga shteti.
“Bujqësia është në gjendje të rëndë që disa vite, mirëpo fatkeqësisht muajve të fundit po rëndohet edhe më shumë. Ajo që e ka rënduar situatën kohëve të fundit është thirrja për aplikim e Ministrisë së Bujqësisë me disa kritere që janë të papërballueshme për t’u subvencionuar për kulturat bujqësore për vitet 2020-2021”, janë shprehur përfaqësues të Sindikatës.
Ata thonë se këto kritere janë diskriminuese për bujqit, duke kërkuar që këto të anulohen.
“Këto kritere janë diskriminuese dhe zhgënjyese për bujqit e Kosovës. Është e habitshme se pse dikush po mundohet t’i shkel dhe zhgënjej bujqit. Shumë prej tyre e ka shuar veprimtarinë e tyre për shkak të perspektivës, pikërisht për shkak të kritereve dhe keqmenaxhimit të drejtave të bujqve. Bujqit i kanë dy kërkesa kryesore. E para është se për vitin 2020-2021 të anulohet ky vendim për thirrje për aplikim për këtë vit prodhues dhe e dyta, të kthejnë kriteret me të vjetrën për të mundur të përfitojnë, përndryshe 80 për qind e bujqve do të mbesin pa u subvencionuar për shkak të këtyre kritereve”, thanë ata./Buletini Ekonomik/
