Një Rregullore e Autoritetit Rregullativ për Komunikime Elektronike dhe Postare (ARKEP) po iu jep të drejtë operatorëve kabllor, në çështjen e pamundësisë së shkëputjes së kontratave me konsumatorë para kohe.
Sipas Rregullores në të cilën po thirren këta operatorë, konsumatorët mund të shkëpusin kontratat me operatorët vetëm pas nëntë (9) muajve të parë prej datës kur është nënshkruar kontrata mes palëve, dhe kurrsesi para kësaj periudhe.
Pas kalimit të nëntë muajve të parë, konsumatorët janë të lirë t’i shkëpusin kontratat pa u ndëshkuar nga operatorët, përcjell Buletini Ekonomik.
Ndërkaq, në rastet kur kontrata kërkohet të shkëputet para 9 muajve të parë, atëherë në bazë të rregullores së ARKEP-it, operatorët kabllor gëzojnë të drejtën e kërkimit të kompensimit të dëmit për shkëputjen e parakohshme të kontratës.
Kjo e drejtë iu jepet atyre përmes nenit 5, pikës 5.7 të “Rregullores për Kontratat, Transparencën dhe Publikimin e Informatave dhe Masave Tjera Mbrojtëse Për Përdoruesit Fundorë për Ofrimin e Rrjeteve dhe Shërbimeve Publike të Komunikimeve Elektronike” të ARKEP-it, në të cilën thuhet se:
“5.7 -Ndërmarrësi mund të kërkoj kompensimin e dëmit për shkëputjen e parakohshme të kontratës gjatë nëntë (9) muajve të parë”.
Mirëpo, edhe ky ndëshkim apo kompensim i dëmit nuk mundet kurrsesi të tejkalojë tarifën e parapagimit mujor për periudhën prej nëntë (9) muajve pas hyrjes në fuqi të kontratës, me përjashtim të rasteve kur përdoruesit fundor i ofrohen pajisje fundore, atëherë zbatohen dispozitat e nenit 9 të Rregullores.
Në ndërkohë, konsumatorët e secilit rrjet të shërbimeve kabllore kanë të drejtën e plotë t’i shkëpusin kontratat me ta pa u ndëshkuar, nëse operatori e paralajmëron paraprakisht klientin rreth modifikimit të kushteve të kontratës jo më vonë se 30 ditë para hyrjes në fuqi të këtyre ndryshimeve. E në rast të mospajtimit me ndryshimin e kushteve nga operatori, parapaguesi pra, konsumatori, ka të drejtë që pa asnjë pasojë ta shkëpusë kontratën në fjalë, edhe pse është para kohe.
Gjithashtu edhe në rastet e rritjes së tarifave, konsumatorët kanë të drejtë të shkëpusin kontratën pa u ndëshkuar deri në ditën e fundit të muajit pas pranimit të faturës së parë si rezultat i këtyre ndryshimeve.
Në nenin 5, pikat 5.1, 5.2, 5.3 të kësaj rregulloreje të ARKEP-it përkufizohet kështu:
5.1. Parapaguesit kanë të drejtë që të shkëpusin kontratën e tyre pa u ndëshkuar pas paralajmërimit për modifikim të kushteve të kontratës të propozuara nga ndërmarrësit që ofrojnë shërbime dhe/ose rrjete të komunikimeve elektronike.
5.2 Parapaguesit duhet të informohen për të gjitha ndryshimet e propozuara në kushtet e kontratës jo më vonë se tridhjetë (30) ditë para hyrjes në fuqi të këtyre ndryshimeve. Në rast të mospajtimit me ndryshimet e kushteve, parapaguesi ka të drejtë që pa asnjë pasojë të shkëputë kontratën.
5.3 Në rast të rritjes së tarifës, parapaguesi ka të drejtë të shkëpus kontratën pa u ndëshkuar deri në ditën e fundit të muajit pas pranimit të faturës së parë si rezultat i këtyre ndryshimeve.”
Në anën tjetër, nga Instituti për Politika Zhvillimore (INDEP) për Buletinin Ekonomik kanë thënë se ligji gjithmonë duhet ta mbrojë palën që ka të drejtë, dhe se konsumatorët duhet të jenë të informuar për tregun, e sidomos për kontratat afatgjate dhe pasojat e këtyre kontratave për ta.
“Ne vazhdimisht kemi bërë thirrje që konsumatorët të mos nënshkruajnë asgjë pa u siguruar që pajtohen me të gjitha pikat e kontratave dhe të informohen mirë për të drejtat por edhe obligimet e tyre si konsumatorë”, thonë nga INDEP.
Ata thonë se e kanë arsyetuar qartazi se pse në rastin e manipulimeve me kontrata nga ana e operatorëve kabllor, konsumatorët kanë të drejtë të shkëputen nga kontratat, pasi operatorët kabllor po bëjnë manipulime dhe shkelje me kontratat e konsumatorëve.
Pra, bazuar në ligje, ata sqarojnë tutje se kanë ofruar dëshmi të mjaftueshme se pse konsumatorët po duan t’i shkëpusin kontratat dhe se kjo e drejtë e tyre është e garantuar me ligj.
Sipas INDEP-it, është fakt që kur konsumatorët nënshkruajnë kontrata afatgjate (6 mujorëshe, 1-2 vjeçare), që njëkohësisht janë të vetmet në dispozicion nga operatorët, ata obligohen me ligj ta respektojnë kontratën deri në momentin që pala tjetër, në këtë rast operatori kabllor, bën shkelje dhe nuk e respekton kontratën me konsumatorin.
E në momentet që konsumatorët ofrojnë argumente se pse duan t’i shkëpusin kontratat, atëherë INDEP thotë se aktivizohet mbrojtja e konsumatorit, e cila iu del në ndihmë konsumatorëve kundrejt operatorëve kabllorë që refuzojnë të pranojnë shkëputjen e këtyre kontratave.
“Situata e muajve të kaluar gjithashtu do të ishte mirë të shërbente si mësim për të gjithë neve konsumatorëve që të mos hyjmë në kontrata afatgjate pa i lexuar mirë termet e kontratave sepse dëmet për ne mund të jenë me kosto të larta financiare. Pra, t’i lexojmë kontratat mirë, e nese kemi kundërshtime për termet e kontratës, të negociojmë dhe kërkojmë që kontrata të ndryshohet, para se të dakordohemi të paguajmë për çfarëdo shërbimi. Në të kundërtën, duhet të konsiderojmë edhe opsionin që biznesi mund ta përdorë pikërisht kontratën e njëjtë si argument kundër nesh, e të na shkaktojnë dëme financiare”, thuhet tutje në përgjigjet e INDEP.
E njëjta rregullore e ARKEP-it, po ashtu saktëson edhe kohëzgjatjen e kontratave duke mbështetur kështu ato prej vetëm prej 24 muajsh, përkatësisht 12 muajve. Pra, te operatorët kabllor në vend nuk ekziston mundësia e një kontrate me kohëzgjatje më pak se 12 muaj apo njëvjeçare.
Përveç kësaj, nga e njëjta rregullore e ARKEP-it del edhe rregulla tjetër rreth kompensimit të ndaljes së shërbimeve, që asnjë operator në vend nuk e zbaton. Kështu, në rastet e ndërprerjes së shërbimeve nga operatorët së paku për një ditë për konsumatorin, atëherë ndërmarrësi apo operatori kabllor është i detyruar ta kompensojë për dy ditë të tjera përdoruesin e shërbimeve që i ofron ai. Kompensimi i tillë sipas Rregullores, mund të bëhet në formë të rimbursimit ose duke zgjatur validitetin varësisht nga lloji i shërbimit ose i pakos. (Mirjeta Shabani) /Buletini Ekonomik/
