Administrata Tatimore e Kosovës (ATK) ka njoftuar të gjithë tatimpaguesit se nëse paguajnë gjobën brenda 15 ditëve, ata do të lirohen 50 për qind nga shuma e gjobës së shqiptuar dhe në këtë rast procedura e ankimimit suprimohet dhe rasti konsiderohet i mbyllur.
Sipas ATK-së, ky vendim vlenë pas aprovimit të Rregullorës së brendshme të ATK-së nr. 01/2022 mbi Përcaktimin e procedurave për funksionimin e Njësive organizative për Gjoba dhe Ndëshkime (ZGjoNA), e cila fillon të zbatohet nga data 01.02.2022.
Në një njoftim në Facebook të lëshuar nga ATK-ja thuhet se me këtë Rregullore janë përcaktuar edhe procedurat pas vendimmarrjes nga ZGjoNA.
Sipas tyre, bazuar në këtë Rregullore, tatimpaguesit ndaj të cilëve ZGjoNA shqipton gjoba fikse për shkelje të legjislacionit tatimor, kanë mundësinë që të përfitojnë zbritje nga pagesa e tërësishme e shumës së gjobës.
Tutje, siç thonë ata, tatimpaguesi i cili nuk paguan gjobën prej pesëdhjetë përqind (50%) brenda pesëmbëdhjetë (15) ditësh, obligohet të paguaj gjobën prej njëqind përqind (100%) të shumës së përcaktuar me Vendim nga ZGjoNA.
“Të drejtën për të përfituar nga pagesa e gjobës vetëm prej pesëdhjetë përqind (50%) e kanë të gjithë tatimpaguesit, duke filluar nga data 01.02.2022”, përfundon njoftimi i tyre./Buletini Ekonomik/
