Kërkesa botërore për naftë do të rritet me më shumë se 2% në një nivel rekord prej 101.6 milionë fuçi në ditë në vitin 2023, deklaroi Agjencia Ndërkombëtare e Energjisë, megjithëse çmimet e larta të naftës dhe dobësimi i parashikimeve ekonomike e zbehën perspektivën e së ardhmes. Agjencia me bazë në Paris tha gjithashtu në raportin e saj mujor se furnizimi po kufizohej për shkak të sanksioneve ndaj Rusisë.
“Shqetësimet ekonomike vazhdojnë, pasi institucione të ndryshme ndërkombëtare kanë publikuar kohët e fundit perspektiva negative,” tha IEA, duke parashikuar se kërkesa do të rritet me 2.2 milionë fuçi në ditë, ose 2.2%, në 2023 krahasuar me 2022 dhe do të tejkalojë nivelet para pandemisë.
“Në mënyrë të ngjashme, shtrëngimi i politikës së bankave qendrore, ndikimi i një dollari amerikan më të fortë dhe rritja e normave të interesit në fuqinë blerëse të ekonomive në zhvillim nënkuptojnë se rreziqet ndaj perspektivës janë të përqendruara në kahun rënës”, theksoi Agjencia.
Ekonomitë e zhvilluara, anëtare të Organizatës për Bashkëpunim Ekonomik dhe Zhvillim (OECD) do të regjistronin rritjen më të madhe të kërkesës në vitin 2022, ndërsa Kina do të kryesonte fitimet në vitin 2023 pasi ajo del nga bllokimet e COVID-19. Kufizimet e fundit të Kinës për COVID-19 e vendosën importuesin më të madh në botë të naftës në rrugën e duhur për rënien e parë të kërkesës këtë shekull.
Rimëkëmbja e përgjithshme e kërkesës dhe kufizimet në ofertë për shkak të sanksioneve ndaj Rusisë dhe rritjeve të kujdesshme të prodhimit nga OPEC+ i shtynë çmimet e naftës mbi 139 dollarë për fuçi në mars. Por, IEA tha se furnizimet së shpejti do të përputheshin me kërkesën, duke shtuar se “pas shtatë tremujorësh radhazi të tërheqjeve të mëdha të inventarit, ngadalësimi i rritjes së kërkesës dhe një rritje në ofertën botërore të naftës deri në fund të vitit duhet të ndihmojnë tregjet botërore të naftës të ribalancohen”.
IEA tha se ekuilibri mund të prishet nga sanksionet më të ashpra ndaj Rusisë, një rimëkëmbje më e madhe e kërkesës kineze, ndërprerjet e furnizimit në Libi dhe kapaciteti i kufizuar i prodhimit midis shteteve të OPEC+./Scan TV/
