Rumania është tregu i dytë më i madh i firmës Revolut në botë

Revolut është rritur me shpejtësi në katër vitet e fundit, kur ka qenë i disponueshëm në Rumani. Sot, Rumania është tregu i dytë më i madh i shitjes me pakicë në botë për teknologjinë financiare britanike, pas Mbretërisë së Bashkuar. Për më tepër, kompania thekson se Bukureshti ka përqendrimin më të lartë të përdoruesve të Revolut në BE, pasi një në tre banorë në moshë pune, përdorin Revolut.

Aplikacioni fintech, i cili u prezantua në Rumani në maj 2018, ka arritur 2 milionë klientë në tregun vendas.
“Katër vite më parë, kur nisëm zyrtarisht operacionet tona në Rumani, Revolut ishte pionier me mbi 20,000 klientë që kishin zbuluar aplikacionin tonë edhe para hyrjes zyrtare në treg.

Në atë kohë, vetëm 9.7% e popullsisë rumune përdorte internet banking, sipas statistikave zyrtare. Në katër vjet, përqindja e vendasve që përdorin internetin për banka dhe financa, është rritur në 18.5%, dhe ka ende hapësirë për rritje, pasi mesatarja e BE-së ishte 58% në vitin 2021”, tha Gabriela Simion, drejtore e përgjithshme e degës rumune të Revolut.

Ajo shtoi: “Në të njëjtën kohë, Revolut në Rumani është bërë një nga performuesit më të mirë të kompanisë, me rreth 500,000 klientë të rinj çdo vit, duke konsoliduar pozicionin në tregun vendas dhe duke hedhur në treg produkte të reja financiare”.

Përdoruesi tipik i Revolut në Rumani është rreth 36 vjeç dhe jeton në një qytet të madh. Bukureshti është qyteti kryesor i Revolut, me rreth 420,000 përdorues. Qytete të tjera rumune me një bazë të madhe klientësh të Revolut, janë Iasi (68,000 përdorues), Cluj-Napoca (65,000 përdorues), Timisoara (56,000 përdorues), Brasov (50,000 përdorues), Konstanca (46,000 përdorues), Craiova (34,000 përdorues), Galati ( 29,000 përdorues), Ploiesti (28,000 përdorues) dhe Sibiu (26,000 përdorues).

Kompania thekson se që nga lançimi i saj në Rumani, klientët kanë shpenzuar mesatarisht 19 euro për transaksion, duke e përdorur kryesisht Revolut për të blerë ushqime dhe produkte të tjera thelbësore, për të paguar për argëtim, për të mbuluar shërbimet komunale dhe për të paguar për shërbimet e transportit. Shitësit me pakicë si Mega Image, Carrefour, Auchan, Lidl dhe Profi, stacionet e benzinës si OMV, Petrom, MOL, Rompetrol dhe platformat e makinave, si Bolt dhe Uber, janë shitësit me pakicë me numrin më të madh të transaksioneve Revolut deri më sot.

Gjithnjë e më shumë klientë po përdorin Revolut për të kryer pagesa ditore, një dukuri e reflektuar në një rritje prej 48% të vëllimit total të transaksioneve në 12 muajt e fundit (korrik 2021 – qershor 2022), krahasuar me të njëjtën periudhë të një viti më parë.

Rumunët gjithashtu e përdorin aplikacionin për të kryer transferta, për të shkëmbyer valutë, për të investuar në aksione ose kriptovaluta, për të kursyer paratë e tyre në arka dixhitale të quajtura “Vaults”, për të bërë dhurime për organizatat joqeveritare përmes funksionit “Donacione”, për të rezervuar për pushime, ose për të menaxhuar shpenzimet familjare me “Revolut Junior”.

Kjo e fundit është një shtesë e llogarisë Revolut, e cila mund të përdoret për blerje, ose tërheqje parash në ATM, dhe gjithashtu ofron veçori për të ndihmuar fëmijët e moshës 6 deri në 17 vjeç që të mësojnë si të menaxhojnë paratë e tyre në një mjedis të sigurt dhe të kontrolluar. Kompania raporton se aktualisht, më shumë se 150,000 klientë vendas, e përdorin Revolut Junior për t’u dhënë fëmijëve para xhepi dhe për t’u mësuar atyre përgjegjësinë fiskale.

Kur bëhet fjalë për investime, numri i klientëve rumunë që investojnë në kriptovaluta, është rritur me 140% në 12 muajt e fundit. Emrat më të njohur janë Bitcoin (BTC), Ethereum (ETH), Ripple (XRP), Cardano (ADA) dhe Skale (SKL).

Përfaqësuesit e Revolut deklarojnë se janë në një proces të vazhdueshëm inovacioni dhe se po modelojnë produkte të reja të përshtatura me infrastrukturën dixhitale globale, për të ndihmuar klientët që të lundrojnë në botën e financave në një mënyrë të sigurt dhe efektive. Një shtesë e re që do të hyjë së shpejti në tregun vendas, është shërbimi “Pay Later”.

Klientët e kualifikuar do të mund ta përdorin këtë shërbim për të paguar blerjet deri në shumën 499 euro, kur blejnë me kartën Revolut. Shërbimi u mundëson klientëve të ndajnë koston e blerjeve në tre këste mujore, nga të cilat, i pari paguhet kur kryhet blerja. Shërbimi vjen me një normë interesi prej 1.65%, e cila ndahet në mënyrë të barabartë midis dy kësteve të fundit.

“Revolut Pay Later u jep klientëve tanë më shumë kontroll dhe fleksibilitet për t’i përdorur paratë me përgjegjësi, duke i lejuar ata të ndajnë koston e blerjes në tre këste. Ai i inkurajon klientët të paguajnë brenda dy muajsh, në vend që t’u drejtohen tërheqjeve të shumave të larta të parave, ose kartave të kreditit”, thotë Joe Heneghan, CEO i Revolut Europe.

Themeluar në Londër nga Nikolay Storonsky dhe Vlad Yatsenko në vitin 2015, Revolut tani ka mbi 18 milionë klientë në mbarë botën. Kompania fintech ofron llogari rrjedhëse të bazuara në aplikacione celulare dhe një numër shërbimesh të lidhura me bankat.

Në dhjetor 2018, Revolut siguroi një licencë Challenger nga Banka Qendrore Europiane, e lehtësuar nga Banka e Lituanisë. Në janar 2022, Revolut u lançua si një bankë në vend të një institucioni të parave elektronike.

Shërbimet e Revolut janë aktualisht të disponueshme në Zonën Ekonomike Europiane, Australi, Singapor, Zvicër, Japoni, Mbretërinë e Bashkuar dhe Shtetet e Bashkuara, dhe kompania planifikon të zgjerohet në më shumë rajone në mbarë botën.