Gati 6 milionë euro janë vjedhur nga llogaritë e lidhura me rrjetin e kriptovalutave Solana pasi një haker shënjestroi tetëmijë kuleta.
Fondacioni Solana, një organizatë që mbështet rrjetin blockchain, tha se një “aktor keqdashës” kishte marrë fonde nga një numër kuletash të lidhura me Solanën.
Ai tha se hakimi kishte prekur rreth 8,000 kuleta, ekuivalenti virtual i kuletave fizike ku përdoruesit ruajnë kriptomonedhën e tyre dhe çelësat privatë që u japin atyre pronësinë unike të aseteve të tyre, raporton theguardian.
“Inxhinierët aktualisht po punojnë me studiues të shumtë të sigurisë dhe ekipe të ekosistemit për të identifikuar shkakun rrënjësor të shfrytëzimit, i cili nuk dihet për momentin”, tha fondacioni përmes Twitterit.
Elliptic, një konsulencë blockchain që ndihmon klientët të luftojnë krimin e lidhur me kriptovalutave, tha se sulmi filloi më 2 gusht dhe deri më tani ishin marrë 5.8 milionë euro. Ai tha se asetet e vjedhura përfshinin kriptomonedhën Solana, ose SOL, dhe tokenat e pandryshueshëm.
“Përdoruesit e blockchain Solana janë bërë objektivi më i fundit për hakerat e kriptovalutave”, tha Elliptic. “Sulmi – i cili filloi më 2 gusht – deri më tani ka parë mbi 5.8 milionë euro fonde të shpenzuara nga 7,947 kuleta. Asetet e vjedhura përfshijnë SOL, një numër të vogël tokenash jo të këmbyeshëm (NFT) dhe mbi 300 tokena me bazë Solana”.
Elliptic shtoi se problemi duket të jetë me softuerin e përdorur nga kuletat e caktuara dhe jo me vetë blockchain, regjistri dixhital që regjistron transaksionet që formon bazën e aseteve kriptovalutave.
