Punëtorët e sigurimit dhe pastrimit kanë paralajmëruar grevë nëse nuk hiqet kushtëzimi për subvencionim të rritjes së pagës në sektorin privat.
Në një konferencë për media, kryetari i Sindikatës së Sektorit Privat, Jusuf Azemi, ka thënë se gjendja e punëtorëve teknikë që punojnë në institucionet publike, por që janë pjesë e kompanive private, është e rënduar.
Ai ka kërkuar nga Qeveria që ta heqë kushtëzimin, pasi që siç kanë thënë kompanitë private nuk i kanë kushtet për t’i paguar pagat me rritje.
Sipas tij, ato mjete që janë planifikuar, të ndahen për këta punëtorë, pasi siç ka thënë këta punëtorë i kanë 130 deri në 170 euro.
“Thika na ka ardhë në palcë dhe nuk mund më të durojmë”, ka thënë Azemi duke i kërkuar Qeverisë që t’i shqyrtojë masën.
