Në kryeqytet, tashmë, ka nisur të funksionojë parkingu nëntokësor i ndërtuar te Fakulteti i Filologjisë. Qytetarët kanë shprehur ankesa për çmimet e larta, derisa nga komuna kanë thënë se projekti ka të bëjë me Partneritet Publiko-Privat dhe se komuna nuk është pronare e plotë e parkingut.
Një qytetar që e vizitoi këtë parking për herë të parë thotë se kryeqyteti ka nevojë për parkingje të tilla, teksa ka folur edhe për çmimet.
“Çmimet mendoj se janë reale. Mendoj se janë me vend, për arsye që mos të uzurpojë dikush për një vit, por të ketë vend për secilin që vjen këtu, që mos ta ngarkojë qytetin”, thotë Fahri Dragusha, qytetar nga Prishtina.
Po ashtu një tjetër qytetar, Ismail Jashanica, thotë se po i pëlqen parkingu nëntokësor, por jo edhe çmimet.
“Çmimet për rrogat tona janë pak të shtrenjta, mirëpo shpenzime të mëdha janë bërë këtu”. Kurse komuna e Prishtinës në rastin e parkingut nëntokësor, ka thënë se ka të bëjë me Partneritet Publiko-Privat, ku Komuna thotë se nuk është pronare e plotë e parkingut”, tha Ismail Jashanica, qytetar.
Si rrjedhojë, përcaktimi i tarifave të parkimit, sipas tyre, është bërë në bazë të çmimit të tregut, si dhe duke marrë parasysh investimet e larta të koncesionarit në ofrimin e sigurisë së lartë dhe kushteve shumë më të favorshme krahasuar me parkingjet tjera me këto çmime.
Kjo komunë ka bërë të ditur se parkingu nëntokësor, është i pari i natyrës së Partneritetit Publiko-Privat (PPP), me teknologji të avancuar dhe standarde të larta urbane.
“Ky është parking nëntokësor, i cili ka rreth 600 vend-parkingje, ku ky parking synon të reduktojë dukshëm qarkullimin e veturave në qendër të qytetit, përfshirë edhe lirimin e trotuareve për këmbësorë”.
Qëllimi i këtij parkingu, sipas komunës, është të shërbejë si stacion i përkohshëm parkimi për vizitorët e Zonës 1 “Qendra”, si dhe të inkurajojë ecjen në këmbë dhe përdorimin e transportit publik për të mirën e ambientit dhe gjithë qytetarëve të Prishtinës.
